Ճանաչում և դատապարտում. Մասաչուսեթսի փողոցներում Հայոց ցեղասպանությունը հիշեցնող վահանակներ են տեղադրվել

ԱՄՆ Մասաչուսեթսի նահանգի մի քանի քաղաքներում, Հայոց ցեղասպանության 98-րդ տարելիցին ընդառաջ, 20-րդ դարասկզբի այդ ոճրագործությունը հիշեցնող վահանակներ են տեղադրվել: Ինչպես հաղորդում է ԱՄՆ-ում հրատարկվող Asbarez պարբերականը, Մեծ եղեռնի զոհերի հիշատակին նվիրված յուրօրինակ ակցիան կազմակերպել է Peace of Art, Inc («Խաղաղության արվեստ») հասարակական կազմակերպությունը, որի հիմնադիրն ամերիկաբնակ հայտնի արվեստագետ Դանիել Վարուժան-Հեջինյանն է: Վահանակներին փակցված պաստառների վրա գրված է. «Հարգելով 1,5 միլիոն զոհերի հիշատակը. Ճանաչում և դատապարտում»: Պաստառի կենտրոնական հատվածում արյունոտ մատնահետքերի վրա մեծատառերով նշված է «Հայոց ցեղասպանություն» բառակապակցությունը: 20-րդ դ. առաջին ցեղասպանության մասին հիշեցնող վահանակները տեղադրվել են Մասաչուսեթսի Ֆոքսբորո, Վոթերթաուն և Քեմբրիջ քաղաքներում: «Այս վահանակների միջոցով մենք հարգում ենք Հայոց ցեղասպանության զոհերի հիշատակը և միջազգային հանրությանը կոչ անում ճանաչել այն և դատապարտել մեղսագործներին»,-ասել է Հեջինյանն ու ավելացրել,-98 տարի է անցել… 1915թ. սոսկալի դեպքերի արյունոտ հետքը դրոշմվել է համաշխարհային պատմության էջերին»:

Դանիել Վարուժան-Հեջինյանը ծնվել է Սիրիայի Հալեպ քաղաքում (ծնողները Սիրիա են գաղթել 1915 թ. դեպքերից հետո): 1979 թ-ից բնակվում է ԱՄՆ-ում: Նկարչի հիմնադրած Peace of Art, Inc կազմակերպությունը 2004թ-ից, Հայոց ցեղասպանության տարելիցներին ընդառաջ, վահանակների միջոցով միջազգային հանրությանը կոչ է անում ճանաչել Հայոց ցեղասպանությունաը: 2012թ-ին Peace of Art-ի «մեսիջը» մասնավորաբար ուղղված էր ԱՄՆ նախագահ Բարաք Օբամային. «Պրն. նախագահ, մեջքով մի’ շրջվեք: Ճանաչե’ք Հայոց ցեղասպանությունը»,-գրված էր 2012թ. վահանակների պաստառների վրա: Այս տարի խաղաղասեր կազմակերպությունը միջազգային հանրությանը նաև կոչ է անում դատապարտել 20-րդ դ. եղեռնագործությունը: «Հայոց ցեղասպանության հարցը միայն հայերի մտահոգության առարկան չէ, այլև յուրաքանչյուրի: Ցեղասպանությունը մարդկության դեմ ուղղված հանցագործություն է: Եթե այն չճանաչվի և չդատապարտվի, ապա կմնա որպես վերք, որից կշարունակի արյուն հոսել…»,-ասել է Հեջինյանը: Հավելենք, որ Ամերիկայի Միացյալ Նահանգներն առ այսօր չի ճանաչել Հայոց ցեղասպանությունը: Հայտնում է tert.am կայքը:

http://lratvakan.am/?p=15221