ԱՄՆ Կոնգրեսում Հայոց ցեղասպանության զոհերի հիշատակին նվիրված միջոցառում կանցկացվի

2013թ. ապրիլի 24-ին Հայոց ցեղասպանության զոհերի հիշատակին նվիրված միջոցառում կանցկացվի նաև ԱՄՆ Կոնգրեսում (օրենսդիր մարմին):

Ինչպես հաղորդում է անգլալեզու Asbarez.com կայքը, Մեծ եղեռնի 98-րդ տարելիցին նվիրված միջոցառումը կազմակերպել է Կոնգրեսի հայկական հարցերով հանձնախումբը՝  ԱՄՆ-ում Հայաստանի դեսպանատան, Լեռնային Ղարաբաղի Հանրապետության գրասենյակի և ԱՄՆ-ում գործող հայկական կազմակերպությունների աջակցությամբ:

Asbarez.com-ի տեղեկացմամբ՝  միջոցառմանը մասնակցելու են ամերիկացի  կոնգրեսականներ, Արցախի և Հայաստանի  կառավարությունների, ինչպես նաև ամերիկահայ համայնքի ներկայացուցիչներ: Միջոցառման առնչությամբ  Ամերիկայի հայ դատի հանձնախումբը հայտարարություն է տարածել, որում նաև ԱՄՆ քաղաքացիներին կոչ է արել կապ հաստատել իրենց շրջանը ներկայացնող օրենսդիրների հետ և նրանց հորդորել մասնակցել հիշատակի արարողությանը:

«Ոգեկոչման այս հանդիսավոր արարողության միջոցով հարգանքի տուրք է մատուցվելու այն միլիոնավոր հայերի, հույների, ասորիների  և մյուս ազգային փոքրամասնությունների հիշատակին (20-րդ դ. սկզբին, 1, 5 միլիոն հայերի հետ միասին, երիտթուրքերի ոճրագործությանը զոհ է դարձել նաև 800 հազարից ավելի ասորի, մի քանի հարյուր հազար հույն-Tert.am), որոնք Առաջին համաշխարհային պատերազմի տարիներին զոհ գնացին Օսմանյան կայսրության կողմից իրականացված բնաջնջման կանխամտածված քաղաքականությանը, որի նպատակն էր դատարկել բիբլիական հայրենիքն իրենց քրիստոնյա բնակչությունից:

Այս հայտարարության միջոցով ցանկանում ենք  ընդգծել, որ Թուրքիայի կառավարությունն առ այսօր դիվանագիտական սպառնալիքների և ճնշումների միջոցով շարունակում է օգուտներ քաղել այդ հանցագործությունից, անգամ փորձում է լռեցնել ամերիկացիների կողմից այդ չարագործության զոհերի հիշատակը հարգելու փորձերը: Այսօր, նախապատերազմյան ժամանակաշրջանի (Առաջին համաշխարհային պատերազմ) հազարավոր եկեղեցիներից Թուրքիայում կանգուն են մոտ100-ը, որի մեծ մասն էլ «գողացվել է»  էլ ավելի անհանդուրժող և հակամերիկյան քաղաքականություն վարող Թուրքիայի կառավարության կողմից՝ նպատակ ունենալով բնաջնջել երբեմնի ծաղկուն քրիստոնեական քաղաքակրթությունները: Մենք բոլորին կոչ ենք անում ներկա գտնվել միջոցառմանը….»,-ասված է հայտարարությունում:

http://www.tert.am/am/news/2013/04/02/genocide-usa/