«Hurriyet»-ը, «Milliyet»-ը և «Zaman»-ը` Երևան-Վան չվերթի հետաձգման մասին

Մարտի 28-ին Թուրքիայի քաղաքացիական ավիացիայի գլխավոր վարչությունը որոշում էր կայացրել անորոշ ժամանակով հետաձգել Երևան-Վան ուղիղ չվերթների իրականացումը։ Չվերթները պետք է իրականցվեին ապրիլի 3-ից սկսած, շաբաթական 2 անգամ հաճախականությամբ:

Այս չվերթը պետք է իրականացվեր հայկական «Նարեկավանք Տուր» ընկերության, թուրքական «Բորաջեթ» ավիաընկերության և Վանի «Այանիս» տուրիստական գործակալության կողմից:

Չվերթի հետաձգումը և դրա հնարավոր պատճառները լայնորեն քննարկվում են թուրքական մամուլում:

Թուրքական «Հյուրիյեթը» այս մասին գրում է. «Թուրքիայի և Հայաստանի միջև մի կարևոր քայլ պետք է արվեր, որը կմոտեցներ 2 ժողովուրդներին և կթուլացներ նրանց միջև առկա լարվածությունը: Սակայն նախաձեռնության մասին լուրերի հայտնվելու առաջին իսկ պահից սկսած` ադրբեջանական մամուլը խստորեն քննադատում էր այս քայլը, և երբ չվերթի իրականացմանը ընդամենը 2 օր էր մնացել, այն չեղյալ հայտարարվեց»:

Իսկ «Միլլիյեթ» պարբերականը նշելով, որ անսպասելի կերպով հետաձգված Երևան-Վան չվերթի պատճառներից մեկն Ադրբեջանն է, գրում է. «Ապրիլի 24-ի նախաշեմին նմանատիպ թռիչքը հակազդեցություն էր առաջացրել, որի պատճառով կազմակերպիչ  ընկերությունը ստիպված հետքայլ է արել: Թռիչքի իրականացման լուրն Ադրբեջանում խիստ արձագանք էր ստացել, չնայած այն հանգամանքին, որ Ադրբեջանում Թուրքիայի դեսպան Իսմայիլ Ալփեր Ջոշքունը, մեկնաբանելով ադրբեջանական մամուլի արձագանքը, բազմիցս նշել էր, որ Երևան-Վան թռիչքը չի հակասում Ադրբեջանի շահերին»:

Թուրքական «Զաման» թերթը թեմայի վերաբերյալ իր անդրադարձն սկսում է հայ-թուրքական հարաբերություններից (հայ-թուրքական ճանապարհային քարտեզ, Ցյուրիխյան արձանագրություններ), սահուն անցում է կատարում Աղթամարի Սբ Խաչ եկեղեցու վերաբացմանը, դրա` հայերի համար ունեցած մեծ նշանակությանը և այդ համատեքստում ներկայացնում Երևան-Վան չվերթի ճակատագիրը:

«Այս չվերթի շնորհիվ շունչ առնող մոռացված անկյունը կսկսեր զարգանալ: Եվ այն պնդումը, թե հայերին թույլ տալով գալ այս հողեր` նրանց հնարավորություն կտա նորից պատմական հարցեր բարձրացնել, անհիմն են, քանի որ հայերն առանց այս 45 րոպեանոց չվերթի էլ գալիս են այս հողերը` անցնելով Վրաստանով»,-գրում է հոդվածագիրը և հավելում, որ չնայած այս պահին չվերթը հետաձգված է, սակայն, ամենայն հավանականությամբ, ապրիլից հետո այն կիրականցվի:

http://www.panorama.am/am/society/2013/04/02/turkish-media/