Թուրքիայի Դիարբեքիր քաղաքի հայ համայնքը 98 տարվա մեջ առաջին անգամ հնչեցրել է Սուրբ Կիրակոս եկեղեցու զանգը` տոնելով Սուրբ Հարության տոնը, սակայն պատշաճ պատարագ չի կարողացել մատուցել` հոգևորականի բացակայության պատճառով: Այդ մասին տեղեկացնում է «Ազատություն» ռադիոկայանը:
Նույն աղբյուրի փոխանցմամբ` Դիարբեքիրի հայկական եկեղեցին գրեթե մեկ դար չգործելուց հետո վերջերս է վերանորոգվել, ինչին հատկացվել է 3 միլիոն 200 հազար դոլար: Տեղեկացնենք, որ եկեղեցու բրոնզե զանգը պատրաստվել է Ռուսաստանում:
Սուրբ Հարության պատարագ մատուցելու համար Դիարբեքիր հոգևորականներ գործուղելու` տեղի հայ համայնքի դիմումին Պոլսո Հայոց պատրիարքարանն արձագանքել է, որ հոգևորականն այնտեղ կարող է լինել միայն մեկ շաբաթից: Այդ իսկ պատճառով եկեղեցում պատարագ չի մատուցվել, թեև հայ համայնքը նշել է տոնը:
Hurriyet Daily News-ի փոխանցմամբ` երկրի քրիստոնյա համայնքների կողմից նշվող Սուրբ Հարության տոնի կապակցությամբ երեկ պաշտոնական հայտարարություններ են հրապարակել Թուրքիայի նախագահ Աբդուլա Գյուլը և վարչապետ Ռեջեփ Էրդողանը:
«Հավատում ենք, որ խաղաղության և ապահովության մեջ համատեղ ապրելու մեր մշակույթը կգերիշխի, ինչպես եղել է անցյալում», – հայտարարել է, մասնավորապես, Էրդողանը:
Ռուբի Հովհաննիսյան
Leave a Reply