Սևրում կբացվի Հայոց ցեղասպանությանը նվիրված թանգարան

Սևր արվարձանում, որտեղ Առաջին համաշխարհային պատերազմի ավարտին Դաշնակից պետությունների և Օսմանյան կայսրության միջև կնքվեց Սևրի պայմանագիրը, նախատեսվում է բացել Եւրոպայում առաջին Հայոց ցեղասպանության թանգարան-հուշահամալիրը: 

Ֆրանսիայի հայկական սփյուռքի կազմակերպությունները Փարիզից հյուսիս-արևմուտք տեղակայված Սևր գավառում գտնվող հայկական քոլեջը ցեղասպանության թանգարան-հուշահամալիրի վերածելու նախաձեռնությամբ են հանդես եկել: Սամվել-Մուրադ քոլեջի տարածքում, բացի թանգարան-հուշարձանից, կառուցվելու են նաև գիտաժողովների համար նախատեսված սրահներ և հետազոտական կենտրոն: Նշվում է, որ հետազոտական կենտրոնը մասնագիտանալու է ցեղասպանության և մարդկության դեմ գործած հանցանքների գծով:

Ցեղասպանության 100-ամյակին շրջանակում սփյուռքի ամենամեծ նախաձեռնություններից մեկը հանդիսացող նախագծի համար անցյալ տարի սեպտեմբերին ստեղծվել է Սևր 2015 միությունը, որը նախագահում է միջազգային իրավունքի դոկտոր, Ֆրանսիայի ակադեմիկոս Ժիրայր Կերկերյանը:

Կերկերյանը նախագծին նվիրված առաջին մամլո ասուլիսի ժամանակ շեշտել է, որ Սևրը «խորհրդանշական» նշանակություն ունի, քանի որ այնտեղ է ստորագրվել Սևրի պայմանագիրը, որով նախատեսվում էր Թուրքիայի արևելքում ստեղծել հայկական պետություն: Նախագծի համար հետագայում նախատեսվում է կառուցել հիմնադրամ, որն էլ կաշխատեցնի թանգարան-հուշահամալիրը:

Հուշահամալիր-թանգարանի նախագծին իրենց աջակցությունն են սկսել ցուցաբերել հայկական սփյուռքին մոտ կանգնած ֆրանսիացի քաղաքական գործիչները: Փարիզի արվարձաններից հոծ հայաբնակ Իսսի-լես-Մուլինոյի քաղաքապետ Անդրե Սանտինին, ով միևնույն ժամանակ նաև պատգամավոր է, հայտնել է, որ աջակցելու է նախագծին:

Նախագծի աջակիցների շարքում է նաև Սևր արվարձանի կազմում գտնվող Օ դը Սենի նահանգային խորհրդի նախագահ, հայ քաղաքական գործիչ Պատրիկ Դևեջյանը: Ֆրանսիայի իշխող Սոցիալիստական կուսակցության անդամ, պատգամավոր Ֆիլիպ Կալտենբախը, ով հայկական համայնքի հետ ջերմ հարաբերություններով հայտնի անուններից մեկն է, օրերս Հայաստանից ժամանած խորհրդարանական պատվիրակության հետ միասին այցելել է վայրը, որտեղ նախատեսվում է թանգարան-հուշահամալիր կառուցել:

Դեռևս հայտնի չէ, թե այս նախագծի ֆինանսավորումն ինչպես է ապահովվելու: Նախատեսվում է հուշահամալիրը բացել 2015 թ.:

Քայհան Քարաջա

http://www.ntvmsnbc.com/id/25418129/

Թարգմանեց Անահիտ Քարտաշյանը

Akunq.net