Թուրքիայի Մուղլա նահանգի Մարմարիս քաղաքում 5 տարի առաջ ավտովթարի հետեւանքով մահացած Արթուր Դոխոյանի հարազատները բողոքի ակցիա են իրականացնել դատական անարդարությունների դեմ։
Թուրքական Haber3-ի փոխանցմամբ՝ Մարմարիսի Յենի Յոլ պողոտայում, որտեղ 5 տարի առաջ ավտովթարից մահացել էր 25-ամյա Արթուր Դոխոյանը, հավաքվել էին նրա հարազատներն ու ընկերները՝ բողոքելով դատարանների կայացրած որոշումների դեմ։
Հայ երիտասարդի մայրը՝ Սուսաննա Մարգարյանը, լրագրողների հետ զրույցում նշել է, որ թեեւ միկրոավտոբուսի վարորդը մտել էր միակողմանի փողոց, որի հետեւանքով տեղի էր ունեցել ավտովթարը, սակայն դատարանը ազատ է արձակել նրան՝ դրամական տուգանքի ենթարկելով։
Սուսաննա Մարգարյանը պատմել է, որ դատարանի որոշումից կատաղած` քարով հարվածել է միկրոավտոբուսի վարորդին պատկանող խանութի ապակուն եւ կոտրել։ «Նրանք իմ ցավերը հաշվի չառնելով՝ իմ դեմ հայց են ներկայացրել, իսկ դատարանն ինձ դատապարտել է 100 օրվա բանտարկության կամ մեկ օրը 20 լիրայի հաշվարկով տուգանքի։ Այսինքն` որդուն կորցրած մորը դատապարտում են 100 օր ազատազրկման, իսկ մարդ սպանողն ազատ շրջում է։ Ես գումարը չեմ վճարելու եւ բանտ կնստեմ»,-ասել է Արթուր Դոխոյանի մայրը։
Նշենք, որ 2008-ի փետրվարի 13-ին մի միկրոավտոբուս հակառակ կողմից մտել է միակողմանի ճանապարհ եւ բախվել ճիշտ ճանապարհով ընթացող մոտոցիկլետին, որի վարորդը՝ Արթուր Դոխոյանը, տեղում մահացել էր։
Leave a Reply