«Մի մոռացեք, որ հայերը թուրքերից շատ ավելի վաղ են այս հողերի վրա բնակվել». թուրքերն արձագանքում են հայերի դեմ հարձակումներին

Թուրք հասարակությունը խստորեն քննադատում է վերջին մեկ ամսվա ընթացքում Ստամբուլի հայաշատ Սամաթյա թաղամասում հայ կանանց նկատմամբ իրականացված հարձակումները: Ինչպես հաղորդում է «Արմենպրես»-ը, թուրքական տարբեր լրատվամիջոցներում տեղ են գտել թուրք բնակիչների անհնագստացած և միևնույն ժամանակ զայրացած մեկնաբանությունները կատարվածի առնչությամբ:

«Իրականությունը պետք է ջրի երես դուրս գա: Անկեղծորեն խղճում եմ այն թուրք նախարարներին, որոնք կատարվածին նայում են որպես սովորական գողության դեպքի: Մի քիչ պատմություն սովորեք. հայերն ու հույները այս հողերի հնագույն ազգերից են: Այս ի՞նչ դաժանություն է: Մի՞թե որոշել են սպանել այնքան, որ ոչ մի հայ կամ հույն այստեղ չմնա»,- զայրացած հարցադրում է կատարել թուրքերից մեկը: Մեկ այլ թուրք ընդգծել է, որ Սամաթյայի անգամ շարքային բնակիչները կատարվածի առնչությամբ անհանգիստ վիճակի մեջ են հայտնվել: Թուրք ընթերցողներից մեկը հետաքրքիր հարցադրում է արել` գրելով. «Քննադատում եմ կատարվածը և ինքս ինձ հարց տալիս. արդյո՞ք Հայաստանում նույն կերպ կվարվեին թուրքերի հետ»:

«Պատկերացրեք, որ ձեր զգեստապահարանում միևնույն գույնի շատ շորեր կան: Հետո պատկերացրեք, որ ամեն զգեստը տարբեր գույնի է: Երփներանգությունը հասարակության հարստությունն է: Հայերը, հրեաները, հույները, ասորիները այս հասարակության հարստությունն են: Բացի դրանից` մի մոռացեք, որ նրանք թուրքերից շատ ավելի վաղ են այս հողերի վրա բնակվել»,- նշել է թուրքերից մեկը:

Սամաթյայում դեկտեմբերի սկզբին 87-ամյա հայ կին էր հարձակման ենթարկվել, ինչի հետեւանքով նա կորցրել էր մի աչքը: Դեկտեմբերի 28-ին Սամաթյայում սեփական բնակարանում դաժանորեն սպանվել էր 84-ամյա հայուհի Մարիցա Քյուչուքը: Մարդասպանը սպանությունից առաջ նրան կտտանքների էր ենթարկել եւ մարմնի վրա խաչ գծել: Կրկին Սամաթյայում, հունվարի 6-ին երեք անձինք բռնությամբ փորձել են մեքենա նստեցնել եւս մեկ տարեց հայ կնոջ, սակայն, կինը դիմադրել էր եւ կարողացել ապաստանել եկեղեցում: Հունվարի 22-ին Սամաթյայում հարձակման էր ենթարկվել 80-ամյա Սուլթան Այքարը: Հարձակվողը եղել էր սեւ հագնված եւ դիմակով: Ականատեսները պնդում են, որ փողոցի անկյունում երկու հոգի հետեւել էին հարձակվողի գործողություններին: Կնոջ բղավոցներից հարևանները դուրս էին թափել, իսկ հարձակվողը փախուստի էր դիմել: Քաշքշոցի ժամանակ ակնոցի ապակին վնասել էր հայ կնոջ աչքը, ինչի հետևանքով նրան վիրահատության էին ենթարկել:

http://armenpress.am/arm/news/706582/mi-moraceq-or-hayery-turqeric-shat-aveli-vax-en-ays-hoxeri.html