Հակառակ ընդհանուր թվի աճին` նվազում է Թուրքիայի արևելյան քաղաքների բնակչությունը

2012 թ. Թուրքիայի բնակչությունը, նախորդ տարվա համեմատ, 1,2 տոկոսով աճել եւ հասել է 75 միլիոն 627 հազարի: 2011 թ. բնակչության թիվը, ըստ Թուրքիայի վիճակագրության ինստիտուտի անցկացրած վերջին մարդահամարի, որի արդյունքները, «Դունյա բուլթենի» կայքէջի վկայությամբ, հրապարակվել են հունվարի 29-ին, եղել է 74 միլիոն 724 հազար:

Մարդահամարի արդյունքներով` աճել է նաեւ երկրի ամենաբազմամարդ քաղաքների բնակչությունը, որոնցից Ստամբուլինը` 1,7 տոկոսով եւ հասել 13 միլիոն 854 հազարի: Ի դեպ` այս ցուցանիշը հավասար է երկրի ընդհանուր բնակչության 18,3 տոկոսին: Այդ ընթացքում Անկարայինը աճել է 6,6 տոկոսով եւ դարձել 4 միլիոն 965 հազար, 4 միլիոն 5 հազար բնակչություն ունեցող Իզմիրում աճը կազմել է 5,3 տոկոս: Աճել է նաեւ Բուրսայի եւ Ադանայի բնակչությունը` համապատասխանաբար հասնելով 2 միլիոն 688 եւ 2 միլիոն 125 հազարի:

Հակառակ նշված քաղաքների` արտագաղթի պատճառով բնակչության կորուստ են ունեցել Սեւ ծովի առափնյա քաղաքներից Սինոփն ու Սամսունը, ինչպես նաեւ Չորումը, Ամասիան, Յոզղաթը, Սվազը: Բնակչության թվի կրճատումը հատկապես նկատելի է դարձել արեւելյան այնպիսի վիլայեթներում, ինչպիսիք են Արդահանը, Կարսը, Աղրըն (Արարատ-Ակունքի խմբ.), Մուշը, Էրզրումը (Կարին-Ակունքի խմբ.) եւ Բայբուրթը: Ի դեպ` Բայբուրթը Բաբերդի աղավաղված ձեւն է եւ 75 հազար 797 բնակիչով Թուրքիայի ամենանոսր բնակեցված վիլայեթը:

Հ. Չ.

http://azg.am/AM/2013013107