Թուրքիայում փորձում են պարզել ճարտարապետ Սինանի ազգային պատկանելությունը

Թուրքիայում ազգայնամոլական տրամադրություններն այնքան են ուժեղացել, որ այժմ անգամ փորձում են պարզել մի քանի հարյուր տարի առաջ Օսմանյան Կայսրության ժամանակաշրջանի ռահվիրա ճարտարապետ Սինանի ազգային պատկանելությունը: Ինչպես հաղորդում է «Արմենպրես»–ը` վկայակոչելով թուրքական «Դողան» լրատվական գործակալությունը, այս մասին հայտարարել է Թուրքիայի խորհրդարանում միակ քրդական Խաղաղություն եւ ժողովրդավարություն կուսակցության (ԽԺԿ) համանախագահ Գյուլթան Քըշանաքը` կուսակցության խմբակցության ժողովում «թուրքական պետության ղեկավարության մեջ ազգայնամոլական մտածելակերպի» քննադատության ժամանակ:

Քուրդ քաղաքական գործիչն ասել է, որ Թուրքիայում այնքան է արմատացած ազգայնամոլությունն ու թրքականությունը գերակա համարելու սովորույթը, որ այդ մտածելակերպը գործում է անգամ այդ երկրի ներկայիս իշխանության մեջ: Քննադատելով թուրքական խորհրդարանի Ժողովրդահանրապետական կուսակցության (Աթաթուրքի հիմնադրած) պատգամավոր Բիրգյուլ Այման Գյուլերի` խորհրդարանում արած այն հայտարարությունը, որ «թուրք ազգն ու քուրդ ժողովուրդը չեն կարող հավասար լինել», ԽԺԿ համանախագահն ասել է, որ այսօրվա Թուրքիայի ղեկավարները նման են 1930-ականներին «թուրք ռասայի գանգը սահմանողներին»:

«Թուրքիայի ազգայնական ղեկավարությունը գերեզմանից հանել եւ ուսումնասիրել է ճարտարապետ Սինանի գանգը` պարզելու նրա իրական ազգությունը: Այժմ Սինանը գերեզմանոցում պառկած է առանց գանգի», -ասել է քուրդ գործիչը: Նա հավելել է, որ «եթե թուրք քաղաքական գործիչները շարունակեն նման մտածելակերպը, ապա նրանք չեն կարող քաղաքական ազդեցություն ունենալ երկրի ապագայի վրա»:

«Վերջին 100 տարվա ընթացքում Թուրքիայի ունեցած խնդիրների հիմքում հենց այդ մտածելակերպն է ընկած: Դա բոլորին թուրքացնելու համար ստեղծված մտածելակերպն է: Թուրքիան պետք է առերեսվի իր այդ ռասիստական մտածելակերպի հետ», – հայտարարել է Քըշանաքը:

Թուրքիայի ղեկավարությանը խիստ անհանգստացրել էին Ստամբուլի «Ակօս» թերթի հայազգի խմբագրապետ Հրանտ Դինքի համարձակ հայտարարություններն այն մասին, որ Թուրքիան միայն թուրքերին չի պատկանում, քանի որ Օսմանյան Կայսրության ժամանակներից ի վեր երկրի կյանքում մեծ դեր են ունեցել նաեւ հայերը: Նա, մասնավորապես, ապացույցներ է բերել այն մասին, որ Օսմանյան Կայսրության ժամանակշրջանի ճարտարապետ Սինանը, որը համարվում է թուրքական ճարտարապետության հիմնադիրը, եւ որի կառուցած շատ շենքեր Թուրքիայում այժմ էլ հանդիսանում են համաշխարհային ճարտարապետության նմուշներ, ազգությամբ հայ է, հայ է նաեւ Աթաթուրքի հոգեզավակ Սաբիհա Գյոքչենը, ով Թուրքիայի առաջին կին ռազմական օդաչուն է, եւ ում անունով է կոչվում Ստամբուլի օդանավակայաններից մեկը: Դա հանդիսացել է  2007 թ. հունվարի 19-ին թուրք ազգայնական շրջանակների կողմից Դինքի դավադիր սպանության պատճառներից մեկը:

http://armenpress.am/arm/news/706644/turqiayum-pordzum-en-parzel-tchartarapet-sinani-azgayin.html