Փասադենայի` Եղեռնին նվիրված հուշակոթողը մեկ տարում 1.5 միլիոն «արցունք» կթափի

Փասադենայում տեղադրվելիք Հայոց ցեղասպանության հուշակոթողի նախագծի համար հայտարարված մրցույթում հաղթել է Արվեստի քոլեջի ուսանողուհի Կատարին Մենարդը։  «Արմենպրես»-ի հաղորդմամբ՝ Փասադենայի Հայոց եղեռնի հուշահամալիրի կառուցման հարցերով զբաղվող կոմիտեին ներկայացված Մենարդի նախագիծը որակվել է որպես «էմոցիոնալ և համոզիչ, որը կհուզի անգամ ապագա սերունդներին»։

Կատարին Մենարդի նախագիծն իրենից ներկայացնում է քարե մի ավազան, որի վերին հատվածում իրար հենված երեք սյուներ են։ Սյուների միացման կետից ամեն երեք վայրկյանը մեկ մի կաթիլ ջուր է կաթում, որը նմանվում է արցունքի և խորհրդանշում Եղեռնին զոհ գնացած մի մարդու կյանք։ Մեկ տարվա ընթացքում ավազանի մեջ կկաթի 1.5 մլն «արցունք»՝ ի հիշատակ թուրքերի կողմից 1915-1918 թվականներին սպանված հայերի։

Նախագիծը ներկայացնելուց առաջ Մենարդը ուսումնասիրել է հայոց պատմության այդ հատվածը, որը, նրա խոսքով՝ «տպավորիչ և ոգեշնչող էր»։ «Սկզբում ես ինձ անարժան էի համարում նման թեմային անդրադառնալու համար։ Սակայն արվեստը պետք է ծառայեցնել նաև մարդկության խոր և մութ էջերը բացահայտելու համար։ Ես ցանկացել եմ այդ ողջ դաժանությունն ու սարսափը ներկայացնել գեղեցիկ, որ այն հիշվի մարդկանց կողմից»,- նշել է Մենարդը։

Հուշակոթողի ստեղծումն ու տեղադրումը նախատեսված է իրականացնել մինչեւ 2015 թվականի ապրիլի 24-ը:

http://armenpress.am/arm/news/706548/pasadenayi-exernin-nvirvats-hushakotoxy-mek-tarum-15-milion.html