Ստամբուլի հայերով բնակեցված Սամաթիա թաղամասում վերջին շրջանում հայերի դեմ իրականացված հարձակումներից հետո հայկական Սուրբ Գեւորգ եկեղեցի է այցելել Ստամբուլի Ֆաթիհի քաղաքապետը եւ ցավակցություն հայտնել ստամբուլահայ համայնքին։
Ստամբուլի հայկական «Ակօս»-ի փոխանցմամբ՝ Ֆաթիհի քաղաքապետ Մուսթաֆա Դեմիրը հունվարի 27-ին այցելել է Սուրբ Գեւորգ եկեղեցի, հայ համայնքի պատասխանատուներից տեղեկություններ ստացել հայերի դեմ տեղի ունեցած հարձակումների մասին։ Թուրք քաղաքապետը հանդիպել է նաեւ հարձակման ենթարկվածների հարազատներին եւ ցավակցություն հայտնել։
Մուսթաֆա Դեմիրը նշել է, թե թույլ չեն տա, որ Սամաթիայի բնակիչները լինեն անհանգստության մեջ՝ շեշտելով, որ առաջիկայում Սամաթիա թաղամասում կտեղադրվեն անվտանգության տեսախցիկներ՝ ապահովելով հսկողություն։
Նշենք, որ դեկտեմբերից սկսված Ստամբուլի հայերով բնակեցված Սամաթիա թաղամասում 4 հարձակում է տեղի ունեցել տարեց հայ կանանց դեմ։ Բոլոր հարձակումներն ունեն նույն ձեռագիրը։ Հարձակումներից մեկի ժամանակ հանցագործը կամ հանցագործները դաժանորեն սպանել են Մարիցա Քյուչուքին։ Հարձակումներից երկուսում հանցագործի դաժան ծեծի հետեւանքով 2 տարեց հայ կանայք զրկվել են աչքերից մեկից։ Իսկ մի դեպքում էլ փորձ է արվել առեւանգել հայ կնոջը։
Leave a Reply