Սուրբ Սարգիս. Երիտասարդներին սպասվում է հագեցած օր

Ամենայն Հայոց Գարեգին II Հայրապետի տնօրինությամբ Մայր Աթոռ Սուրբ Էջմիածնից Առաջնորդանիստ Ս. Սարգիս եկեղեցի կբերվեն Ս. Սարգիս Զորավարի մասունքները:
Qahana.am կայքում ներկայացված է օրվա ընթացքում կազմակերպվելիք միջոցառումների ցանկը:

Եվ այսպես.
Ժամը 10.30-ից Ս. Պատարագի ընթացքում ժողովուրդը կկարողանա հաղորդ լինել սրբի մասունքներին և հայցել սրբի բարեխոսությունը:

Ժամը 11.00-ին, Արարատյան Հայրապետական թեմի բոլոր եկեղեցիներում կկատարվի երիտասարդների օրհնության կարգ:
Արարատյան Հայրապետական թեմի առաջնորդական փոխանորդ բարձրաշնորհ Տեր Նավասարդ արքեպիոսկոպոս Կճոյանի օրհնությամբ թեմի Առաջնորդանիստ, Նոր Նորքի և Արգավանդի Ս. Սարգսի անունը կրող եկեղեցիները բաց կլինեն մինչև ժ. 22.00-ն:

Այսօր ժ.14.00-ին Արարատյան Հայրապետական թեմը և Գեղագիտության Ազգային կենտրոնը երիտասարդների բարեխոս Ս. Սարգսի տոնին կազմակերպում է մանկապատանեկան տոնական ցուցահանդես, որին մասնակցելու է նաև վարչապետ Տիգրան Սարգսյանը:

Ժամը 14.40-ին, Նկարիչների միության տանը կբացվի պրոֆեսիոնալ երիտասարդ ստեղծագործողների ցուցահանդես, որին ներկա է լինելու Տիգրան Սարգսյանը:

Երիտասարդների առաջարկով Սուրբ Սարգսի տոնակատարություններին ավելացել է ևս մեկ միջոցառում: Ժամը 14:30-ին, Երևանի (Կոնդ) Սուրբ Հովհաննես եկեղեցու բակից կմեկնարկի խաչերթ դեպի Սիրահարների այգի: Հոգևորականների առաջնորդությամբ մասնակից երիտասարդներին կուղեկցեն Սուրբ Սարգսի կերպարը խորհրդանշող ձիավորը, դրոշակակիրներ և թմբկահարներ: Խաչերթի մասնակիցները Սիրահարների այգում կմիանան տեղի ունեցող յուրահատուկ համերգային ծրագրին:

Ժամը 15.00-ին, Երիտասարդների բարեխոս Ս. Սարգսի տոնին, Արարատյան Հայրապետական թեմը «Պողոսյան» պարտեզներում կազմակերպում է մեծ տոնախմբություն: Համերգային ծրագիր, նվերներով ձիավոր, հյուրասիրություն «Սիրահարների այգում»: Մուտքն ազատ է: Մասնակցելու են վարչապետ Տիգրան Սարգսյանը, Երևանի քաղաքապետարան Տարոն Մարգարյանը:

Ս. Սարգսի տոնախմբությունն իրականանում է Հայաստանի Հանրապետության նախագահ Սերժ Սարգսյանի բարձր հովանու ներքո:

Տոնի շրջանակներում ժամը 13.00-ին Թումանյանի տուն-թանգարանում լինելու է «Ռոտոնդա» թատերախմբի տոնական ներկայացում, զրույց, խաղեր: Ներկա կլինեն նաև Հալեպի «Կիլիկիա» վարժարանի սաները: Հունվարի 27-ին ժ. 13.00-ին, Վ. Սարգսյանի անվան ռազմական ակադեմիայում «Ռոտոնդա» թատերախմբի մասնակցությամբ լինելու է տոնական միջոցառում:

http://www.panorama.am/am/society/2013/01/26/surb-sagis-feast/