Ստամբուլի հայաշատ Սամաթիա թաղամասում վերջին շրջանում հայերի հանդեպ գործադրված հարձակումները պատճառ են դարձել մտահոգվելու, որ հարձակումների ալիքը Թուրքիայում բնակվող հայերի նկատմամբ կազմակերպված գործողությունների մաս է կազմում: Ինչպես հաղորդում է «Արմենպրես»-ը` այս հարցին իր հոդվածում անդրադարձել է Today’s Zaman պարբերականի սյունակագիր Նիկոլ Փոփը:
Նա ընդգծել է, որ տարբեր քաղաքացիական կազմակերպություններ մոտիկից հետևում են կատարվող իրադարձություններին և պահանջում պատասխան տալ իրենց հուզող հարցերին, ինչպես նաև` ապահովել Թուրքիայում Սամաթիայի նման հայաբնակ շրջանների անվտանգությունը: Չնայած այն հանգամանքին, որ ոստիկանությունը սկսել է հետաքննությունը, սակայն մեղավորները դեռ հայտնաբերված չեն:
«Երկար ժամանակ լրատվամիջոցներով և դատական նիստերի միջոցով ներքին թշնամի հայտարարված լրագրող Հրանտ Դինքի սպանությունից 6 տարի անց արդյոք Թուրքիայում պակասել է ատելության վրա հիմնված հանցագործությունների թիվը: Արդյոք Թուրքիան դարձել է ավելի ընդգրկուն հասարակություն»,- հարցադրում է անում Փոփը: Նա նշում է, որ առավել դրական էր միայն այն, որ Դինքի սպանությունը ցնցեց ողջ Թուրքիան, և լրատվամիջոցները սկսեցին հանդես գալ արդեն անկողմնակալ հոդվածներով: Սակայն եթե խտրականությունը դարձել է ավելի զուսպ, ապա դա դեռ չի նշանակում, որ այն ամբողջությամբ վերացել է: Երկրում նախապաշարմունքները դեռ չեն վերացել, և որոշ ազգայնական լրատվամիջոցներ շարունակում են տարածել այն գաղափարը, որ «թուրք սուննիները երկրի իսկական քաղաքացիներն են»:
«Ոչ մի երկիր զերծ չէ խտրականությունից: Թուրքիայում լրատվամիջոցների կողմնակալ և սադրիչ խորագրերով հոդվածները նպատակ ունեն համահունչ լինել երկրի քաղաքական օրակարգին: Կարևոր են քաղաքական գործիչների վերաբերմունքը, նրանց գործածած լեզուն և ստեղծված իրադրությանը նրանց տված պատասխանը, քանի որ նրանք ունեն մեծ ներուժ սխալ պատկերացումներն ամրապնդելու, ինչպես նաև հասարակությունը մասնատելու համար», – գրում է թուրք սյունակագիրը:
Նա կարևորել է ԶԼՄ-ների իրազեկումը եւ միաժամանակ նկատել, որ ի վերջո երկրի քաղաքական գործիչներն էլ պետք է նախաձեռնեն միջոցառումներ, որոնք Թուրքիան կդարձնեն այնպիսի երկիր, որի բոլոր քաղաքացիները, անկախ ծագումից, հավասար կլինեն: «Հուսանք, որ երկրի ղեկավարները մեծ հետաքրքրություն կցուցաբերեն Սամաթիայի հարձակումների նկատմամբ, և մանրամասն հետաքննությունը կհանգեցնի հանցագործների ձերբակալմանը»,-եզրափակել է Նիկոլ Փոփը:
http://armenpress.am/arm/news/706195/turqiayum-hayeri-dem-hardzakumnery-karox-en-kazmakerpvats.html
Leave a Reply