Սևակ Շահինի սպանությունն Ապրիլի 24-ին պատահականություն չէ. Թուրքիայում սպանված հայազգի զինվորի փաստաբան

Դիարբեքիրի 2-րդ ռազմական հանցագործությունների դատարանում Թուրքիայի Բաթման նահանգում պարտադիր զինվորական ծառայության ընթացքում սպանված հայազգի Սևակ Շահին Բալըքչըի գործով հերթական դատական նիստն է տեղի ունեցել. տեղեկացնում է Sondakika լրատվական կայքը։
Դատական նիստի ընթացքում քննվել են 7 զինծառայողների վկայությունները, որոնցում Սևակի հարազատները հակասություններ էին հայտնաբերել, և պնդում էին, որ զինվորները վկայություն են տվել ճնշումների ազդեցության տակ։
Մեղադրող կողմը միջնորդություն է ներկայացրել նրանց վկայությունը դարձյալ լսելու վերաբերյալ, սակայն դատարանը մերժել է այն՝ պատճառաբանելով, որ դա կձգձգի դատական գործընթացը։
Մարդասպան Քըվանչ Աղաօղլուի փաստաբան Իբրահիմ Գյոքը պնդել է, որ «հայ գաղտնի խմբավորումը» ցանկանում է սպանել Քվանչին ուստի նրան պետական պաշտպանություն է անհրաժեշտ, սակայն դատարանը մերժել է նաև այս միջնորդությունը։
Փաստաբանը պնդել է, որ Սևակն ու Աղաօղլուն մոտ ընկերներ են եղել, և Քըվանչը Սևակին ոչ թե միտումնավոր, այլ սխալմունքի հետևանքով է սպանել։
Բալըքչը ընտանիքի փաստաբան Ջեմ Հալավուրթը պնդել է, որ տեղի է ունեցել կանխամտածված սպանություն, և միայն այն, որ Սևակը սպանվել է հենց Ապրիլի 24-ին՝ Հայոց ցեղասպանության հիշատակի օրը, պատահականություն լինել չի կարող։