Ստամբուլի` հայերով բնակեցված Սամաթիա թաղամասում հայտարարվել է պարեկային ժամ` վերջին շաբաթների ընթացքում հայ կանանց վրա հարձակումներից հետո: Այս մասին նշել է հայ-թուրքական «Ակօս» թերթը` վկայակոչելով ակտիվիստների և Սամաթիայի աղբյուրները:
Ստամբուլի Աքսարայ ոստիկանական բաժինը հայտնել է, որ հայկական թաղամասում հաստատվել է պարեկային 20 կետ, և քաղաքացիական հագուստով 100 ոստիկան է հսկողություն կատարում թաղամասում: Ոստիկանությունը նաև հայտնել է, որ վերջին հարձակումների հետևում գուցե 1 մարդ է կանգնած:
Այս օրերին «Ակօս» թերթի տիտղոսաթերթերի վրա գրված է. «Թուրքիան լուռ է, հարձակումները շարունակվում են»:
Կիրակի օրը՝ հունվարի 27-ին, Մարդու իրավունքների կազմակերպության Ստամբուլի գրասենյակը, «Նոր Զարթոնք» հայ երիտասարդական կազմակերպությունը և Անատոլիայի «Ակադեր» մշակութային կազմակերպությունը հանրահավաք են անցկացնելու Սամաթիայում:
Վերջին օրերին թուրքական որոշ լրատվամիջոցներ և քաղաքական գործիչներ խոսում են հայ կանանց վրա հարձակումների մասին, չնայած որ Թուրքիայի կառավարությունն, ընդհանուր առմամբ, լռություն է պահպանում:
Հիշեցնենք, որ վերջին շաբաթների ընթացքում Սամաթիայում սպանվել է 1 կին, վիրավորվել՝ 3-ը:
Leave a Reply