ԱՄՆ. Թուրքիայում տարեց հայ կանանց նկատմամբ հարձակումներն անհանգստացնող են

ԱՄՆ պետքարտուղարությանը մտահոգել է Ստամբուլի հայաշատ Սամաթիա թաղամասում տարեց հայ կանանց նկատմամբ պարբերաբար տեղի ունեցող հարձակումներն ու բռնությունները: Վերջին մեկ ամսվա ընթացքում իրար հաջորդած չորս հարձակումներից տագնապած ամերիկյան կողմը հետազոտում է այդ բռնությունների դրդապատճառները:  Այս մասին տեղեկանում ենք  «Արմենպրեսս» կայքից:

Պատասխան որոնող հիմնական հարցը հետևյալն է. «Աճող հարձակումներն արդյո՞ք Թուրքիայում հայերին ուղղված ատելության նոր ալիքի բանբեր է»: Այս մասին, ինչպես հաղորդում է «Արմենպրես»-ը, հայտնում է թուրքական «Հուրիեթ» թերթը: ԱՄՆ պետքարտուղարությանը ստիպել են Թուրքիայում հայերի նկատմամբ բռնություններին հետևել թուրքական և միջազգային մամուլում այդ մասին հայտնված հաղորդագրությունները:

Թուրքիայում տարեց հայ կանանց նկատմամբ հարձակումների վերաբերյալ առաջին քայլն արել է ԱՄՆ-ում տեղակայված Միջազգային ներման կազմակերպությունը (Amnesty International): Ամերիկացիներին զարմացրել է այն, որ անցյալ դեկտեմբերի սկզբից սկսված այդ հանցագործությունների մասին թուրքական մամուլն ու հեռուստաալիքները պատշաճ տեղ չեն հատկացնում:
Թերթը հայտնում է, որ Ստամբուլի ոստիկանությունը պարզել է, որ տարեց մեկ հայ կնոջ սպանությունն ու երեքի վիրավորվելու հանցագործությունը կատարել է միևնույն անձը, և այժմ միջոցառումներ է ձեռնարկում հանցագործին բռնելու ուղղությամբ:

Հիշեցնենք՝ Սամաթիայում դեկտեմբերի սկզբին հարձակման ենթարկված  87-ամյա հայ կին կորցրել է մի աչքը: Դեկտեմբերի 28-ին Սամաթիայում սեփական բնակարանում դաժանորեն սպանվել է 84-ամյա հայուհի Մարիցա Քյուչուքը: Մարդասպանը սպանությունից առաջ նրան կտտանքների էր ենթարկել և մարմնի վրա խաչ գծել: Կրկին Սամաթիայում, հունվարի 6-ին երեք անձինք բռնությամբ փորձել են նստեցնել մեքենա նստեցնել ևս մեկ տարեց հայ կնոջ, սակայն, կինը դիմադրել էր և կարողացել ապաստանել եկեղեցում:

Հունվարի 22-ին Սամաթիայում հարձակման էր ենթարկվել 80-ամյա Սուլթան Այքարը: Հարձակվողը եղել էր սև հագնված և դիմակով: Ականատեսները պնդում են, որ փողոցի անկյունում երկու հոգի հետևել են հարձակվողի գործողություններին: Կնոջ բղավոցներից հարևանները դուրս են թափվել, իսկ հարձակվողը փախուստի է դիմել: Քաշքշոցի ժամանակ ակնոցի ապակին վնասել է հայ կնոջ աչքը: Նրան վիրահատության են ենթարկել:

http://www.aysor.am/am/news/2013/01/25/usa-samatia/