Hurriyet. Թողեք, որ հայերն իրենց բնական մահով մահանան

«Այն, ինչ վերջին մեկ ամսում տեղի է ունենում հայաբնակ Սամաթիայում, նույնիսկ սարսափ ֆիլմերում չեք տեսնի»,- գրում է թուրքական «Hurriyet» օրաթերթը` հիշեցնելով Ստամբուլի հայաբնակ այդ թաղամասում անհայտ չարագործների կողմից հայ տարեց կանանց դեմ կատարված հարձակումների ժամանակագրությունը.

2012 թ. դեկտեմբերի սկզբին տուն մտնելիս հարձակման էր ենթարկվել 87-ամյա հայ կին: Ծեծի ենթարկելուց հետո նա կորցրել է մեկ աչքի տեսողությունը:

2012 թ. դեկտմբերի վերջին իր բնակարանում դանակի բազմաթիվ հարվածներից սպանվել է 85-ամյա մեկ այլ հայ կին:

2013 թ. հունվարի 6-ին Սուրբ Գևորգ եկեղեցի գնացող տարեց հայ կնոջ են փորձել առևանգել:

2013 թ. հունվարի 22-ին էլ 83-ամյա հայ կին է հարձակման ու ծեծի ենթարկվել: Նրա ձախ աչքը վիրահատել են. բժիշկները հույս չեն տալիս, որ տեսողությունը կվերականգնվի:

Հիվանդանոցում վերջինիս այցելել է թուրքական պարբերականի թղթակիցը և պարզել, որ Սամաթիայում արդեն հայերը նույնիսկ վախենում են փողոց դուրս գալ: Անծանոթ անցորդներն արդեն սարսափելի են թվում:

«Մենք ամենքս վախի մեջ ենք: Մեզ մի սպանեք, մենք ուզում ենք մեր բնական մահով մահանալ»,- ասել է հոսպիտալացված 83-ամյա հայուհին:

http://ermenihaber.am/?lang_id=2&news_=4&cur_news=385