Այս անգամ խորհրդարանում ֆաշիստական հարձակման ենթարկվեցին քրդերը, ենթատեքստում նաև հայերն էին:
Թուրքական ֆաշիզմն ամենևին չի թաքնվում քաղաքական ետնամուտքերում, այլ պարբերաբար իր մասին հայտարարում է անգամ Մեծ մեջլիսի ամբիոնից:
Եթե ֆաշիստական հայտարարություններ անեին միայն թուրքական Ազգայնական շարժում կուսակցության պատգամավորները, դա ինչ-որ տեղ հասկանալի կլիներ: Բայց երբ խորհրդարանի ամբիոնից ֆաշիստական հայտարություներ են կատարում նաև հիմնական ընդդիմադիր Հանրապետական ժողովրդական կուսակցության պատգամավորները, նշանակում է Թուրքիայի քաղաքական դաշտը «հերկված և ցանված է ֆաշիզմի սերմերով»:
Թուրքիայի Մեծ մեջլիսի` Հանրապետական ժողովրդական կուսակցության Իզմիրի պատգամավոր Բիրգյուլ Այմանը քրդական Խաղաղություն և համերաշխություն խորհրդարանի պատգամավորների հետ բանավեճի ժամանակ ամբիոնից հայտարարել է հետևյալը. «Թուրք ազգի հետ քուրդ ժողովուրդը հավասար չէ, հավասար արժեքով չդիտարկեք»: Այս արտահայտությունը ծափերի է արժանացել Հանրապետական ժողովրդական և Ազգայնական շարժում կուսակցությունների պատգամավորների կողմից:
Իսկ մեկ այլ քեմալիստ պատգամավոր Մահմուդ Էսաթ Բոզքուրթը էլ ավելի հեռուն է գնացել իր ֆաշիստական դրսևորումներում. «Թուրք ազգը այս երկրի միակ հեգեմոնն է, միակ տիրակալը: Մաքուր թուրք ազգին չպատկանող այլք այս երկրում միան մեկ իրավունք ունեն՝ ծառայելու, ստրուկ լինելու, բարեկամ կամ թշնամի համարվելու իրավունք: Նույնիսկ լեռներում գտնվողները պետք է այս ճշմարտությունն իմանան»:
Սա է այսօր թուրք քաղաքական էլիտայի մտածելակերպը:
Leave a Reply