Ստամբուլի Սամաթիա թաղամասում հերթական հարձակումն է իրականացվել հայ կնոջ վրա

Ստամբուլի Սամաթիա թաղամասում հայ կանանց նկատմամբ իրականացված բռնությունների հերթական դեպքն է գրանցվել, տեղեկացնում է «Ակօս»-ը։

Հերթական միջադեպը տեղի է ունեցել երեկ. հարձակման է ենթարկվել 80-ամյա հայուհի Սուլթան Այքարը։

Երեկ երեկոյան ժամը 17։00-ի սահմաններում տարեց կինը տուն վերադառնալիս է եղել, երբ նրա վրա է հարձակվել ամբողջությամբ սև հագած, շուրջ 35 տարեկան մի տղամարդ։ Հանցագործը նրան հարվածել է բռունցքներով, գցել գետնին։ Տարեց հայուհու աչքի տակ կապտուկներ են գոյացել, բերանն արյուն է լցվել։ Տղամարդը փորձել է նրան տուն մտցնել, սակայն կինն «օգնություն» է բղավել և հարևանների շնորհիվ փրկվել։

Հանցագործը դեպքի վայրից դիմել է փախուստի։

80-ամյա Սուլթան Այքարն այս պահին աչքի վիրահատության է ենթարկվում Ստամբուլի հիվանդանոցներից մեկում։

Հիշեցնենք, որ դեկտեմբերի 28-ին այս թաղամասում սպանվել էր 84-ամյա Մարիցա Քյուչուքը, ինչին նախորդել էր մեկ այլ հայուհու վրա իրականացված հարձակումը, որի հետևանքով վնասվել էր նրա աչքը։ Ավելի ուշ անհայտ անձինք նույն թաղամասում փորձել էին առևանգել ևս մի հայ կնոջ։

http://tert.am/am/news/2013/01/23/samatya-armenian-woman/