Ֆրանսիայում ձերբակալվել է երեք քուրդ կանանց մարդասպան կասկածյալը

Ֆրանսիայի ոստիկանությունը ձերբակալել է ազգությամբ թուրք, 30-ամյա Օմեր Գյունեյին, որը կասկածվում է Քուրդիստանի` Փարիզում գտնվող տեղեկատվական կենտրոնում երեք քուրդ քաղաքական ակտիվիստ կանանց` Սաքինե Ջանսըզի, Լեյլա Սոլեմեզի եւ Ֆիդան Դողանի սպանության մեջ: Այս մասին, ինչպես հաղորդում է «Արմենպրես»–ը, հայտնում են թուրքական ԶԼՄ-ները: Նշվում է, որ կասկածյալը ծնվել է Թուրքիայի Սիվասի (Սեբաստիա-Ակունքի խմբ.) շրջանի Շարքըշլա բնակավայրում:

Թուրքական մամուլը շտապել է հայտարարել, թե կասկածյալը Քուրդիստանի աշխատավորական կուսակցության (PKK) անդամ է եւ այդ կուսակցությանն անդամագրվել է երկու տարի առաջ: PKK-ն պաշտոնապես հայտարարել է, որ կազմակերպությունը նման անունով անդամ երբեք չի ունեցել եւ չունի: Ձերբակալվածի ընտանիքը թուրքական լրատվամիջոցներին հայտնել է, որ իրենք երբեք որեւէ կապ չեն ունեցել PKK-ի հետ:

Որոշ լրատվամիջոցներ հայտնում են, որ կասկածյալը եղել է PKK-ի հիմնադիրներից համարվող Սաքինե Ջանսըզի ոչ պաշտոնական վարորդը եւ օգնել է նրան Փարիզում տեղաշարժվելու գործում: Դա հաստատում է ֆրանսիական ոստիկանության այն վարկածը, որ սպանվածները ճանաչել են մարդասպանին, քանի որ նրա առաջ բացել են գործակալության դուռը: Բացի այդ` նախնական հետաքննության տվյալներով մարդասպանը քրդական կենտրոն է այցելել առավոտյան եւ կեսօրին մոտ, իսկ փորձագիտության տվյալներով` սպանությունը կատարվել է կեսօրին: Հայտնի չէ, թե ինչպես է մարդասպանին հաջողվել շահել Սաքինե Ջանսըզի վստահությունը:

Ավելի վաղ լրատվամիջոցները հայտնել են, որ մարդասպանն իր զոհերին սպանել է անձայն ատրճանակով` կրակելով նրանց գլխին, այնուհետեւ բանալիով դրսից փակել է դուռը եւ հեռացել: Նշվում է նաեւ, որ ձերբակալված կասկածյալը հերքում է իր դեմ ներկայացված մեղադրանքները:

http://armenpress.am/arm/news/705809/fransiayum-dzerbakalvel-e-ereq-qurd-kananc-mardaspan.html