Թուրքիայում զինվորական ծառայության ընթացքում սպանված հայազգի Սևակ Բալըքչի սպանության գործով դատավարությունը կշարունակվի ուրբաթ՝ հունվարի 25-ին։ Դեպքն անզգուշության հետևանքով լինելու մասին բազմաթիվ վկայություններ կան, սակայն մարդասպան Քըվանչ Աղաօղլուն պնդում է, որ տեղի ունեցածը դժբախտ պատահար էր։
Թուրքական Taraf պարբերականը զրուցել է Սևակի ծնողների հետ։
Հարցին, թե ինչո՞ւ են վկաները փոխել նախնական վկայությունը կանխամտածված սպանության մասին և հիմա պնդում են, որ տեղի ունեցածը դժբախտ պատահար էր, մայրը պատասխանել է. «Ակնհայտ է, որ նրանց սպառնացել են։ Բոլորն ասում են՝ չենք տեսել, չենք լսել։ Նրանք մի քանի անգամ վկայություն փոխեցին»։
Սևակի հայրն իր հերթին հավելել է. «Հարյուր տոկոսով վստահ եմ՝ դժբախտ պատահար չէ։ Կատակելու ընթացքում չի եղել, ինչպես պնդում են։ Դեպքի վայրը կատակելու վայր չէ, նրանց միջև փշալար է եղել, ինչպե՞ս կարող էին կատակել։ Քրեական զեկույցներն էլ վկայում են, որ զենքը Սևակին է ուղղված եղել»,-ասել է Սևակի հայրը։
Հարցին, թե ինչո՞ւ էր զորամասում հենց Սևակը սպանվել, հայրը պատասխանել է. «Այդ օրն Ապրիլի 24-ն էր, Զատիկ էր, 96 տարի անց նույն օրը համընկել էր Զատկի տոնի հետ։ Այդ օրը մի հայ պետք է մահանար։ Ես սրան եմ հավատում։ Նույնը մեկ այլ հայ երեխայի հետ կարող էր պատահել»։
Նա նաև հայտարարել է, թե իր համոզմամբ՝ մարդասպանի թիկունքին այլ մարդիկ էլ են եղել, ինչը պետք է ուսումնասիրվի։ «Գուցե հրաման է եկել, որ այդ օրը մի հայի սպանեն»,-ասել է նա։
Անդրադառնալով վերջերս Ստամբուլի Սամաթիա թաղամասում հայ կանանց նկատմամբ իրականացված բռնություններին՝ Սևակի մայրը նշել է, որ դա մտահոգում է իրենց։
«Վախենում ենք, որ մեր երիտասարդներին մի վատ բան կպատահի։ Սամաթիայի ծեր կնոջից ի՞նչ ուզեցին։ Մեկ ուրիշին փորձեցին առևանգել, չկարողացան։ Մի ժամանակ նման սպանություններ, առևանգումներ, անհանգտություն պատճառելու դեպքեր չկային։ Մեզ միայն «գյավուր» էին ասում, իսկ հետո ընկերանում էինք ասողների հետ»,-ասել է Սևակի մայրը։
Պատասխանելով հարցին, թե արդյոք հավատո՞ւմ են դատավարության արդարությանը, նա պատասխանել է. «Հույս ունենք։ Այդքան փաստ կա հավաքված, և չեմ կարծում, որ դատարանը սխալ որոշում կկայացնի։ Ցանկանում եմ, որ այս դատավարությունն արդար լուծում ունենա»։
Leave a Reply