Թուրքիայի երկակի պահվածքը, այս կամ այն փուլում նոր նախապայմանների առաջադրումը, այս կամ այն իրավիճակն անհիմն ձեւով ըստ սեփական ցանկության մեկնաբանումը հանգեցրին նրան, որ գործընթացը փաստացիորեն սառեցված է, հայտարարել է Հայաստանի նախագահ Սերժ Սարգսյանը` «Անդին» ամսագրին տված հարցազրույցում ներկայացնելով հայ-թուրքական հարաբերությունների վիճակը:
«Մենք Թուրքիայի հետ գործընթացը նախաձեռնեցինք շատ անկեղծ նպատակով՝ տարածաշրջանում հասնելու բարիդրացիության, անվտանգության եւ համագործակցության նոր մակարդակի: Ասել, թե այնքան միամիտ էինք, որ կարծում էինք՝ դա հեշտ է լինելու, շատ սխալ կլինի: Այսօր կարելի է գնահատել գործընթացի արդյունքը. Թուրքիայի երկակի պահվածքը, այս կամ այն փուլում նոր նախապայմանների առաջադրումը, այս կամ այն իրավիճակն անհիմն ձեւով ըստ սեփական ցանկության մեկնաբանումը հանգեցրին նրան, որ գործընթացը փաստացիորեն սառեցված է: Եվ այսօր կարելի է արձանագրել հետեւյալը. նման զարգացումը մեզ համար, որքան էլ ցավալի լիներ, անակնկալ չէր, իսկ ողջ միջազգային հանրությունը առնվազն իր համար արձանագրեց Թուրքիայի իրական դեմքը, եւ համոզված եմ, որ այն բոլոր մտահոգությունները, որոնք մենք ունեցել ենք եւ ունենք Թուրքիայի առնչությամբ, ներկայում արդեն ընկալելի են նաեւ մեր միջազգային գործընկերների համար: Թուրքիայի հետ այս ողջ գործընթացը մեզ հնարավորություն տվեց սփյուռքի մեր հայրենակիցների եւ մեր սեփական հանրության հետ երկխոսությունը բարձրացնել մի նոր ու խոստումնալից մակարդակի: Մենք բոլորս ականատեսը եղանք քաղաքական նոր մշակույթի դրսեւորման: Ի դեպ` եւ՛ մեր հանրությունը, եւ՛ ողջ աշխարհը համոզվեց նրանում, որ մեզ համար ամենաբարդ խնդիրներն անգամ, ամենայն անկեղծությամբ, ներկայացվել են թե՛ հանրությանը, թե՛ միջազգային գործընկերներին:
Շատերը թերահավատությամբ էին մոտենում մեր կողմից նախաձեռնված հայ-թուրքական հարաբերությունների նորմալացմանը՝ պնդելով, թե արձանագրությունները նպաստավոր են Թուրքիային: Պատասխանեք, խնդրում եմ, մի պարզ հարցի. եթե արձանագրություններն իսկապես նվեր էին Թուրքիային, ապա ինչո՞ւ դրանք դարձան Թուրքիայում ներքաղաքական լարվածության առիթ, իսկ դրանց վավերացումը՝ անիրականանալի:
Եթե նայենք ապագային, կարծում եմ՝ ժամանակն է Հայաստան-Թուրքիա գործընթացում մեզ աջակցած ուղղակի եւ անուղղակի միջնորդների հետ հստակեցնել «ողջամիտ ժամկետներ» կոչվածը, եւ այդ ժամկետների ընդհանրական ընկալումն ապահովելուց հետո, եթե այդ ընթացքում Թուրքիայի կողմից չիրականացվեն համապատասխան քայլեր, անցնել գործողությունների: Մենք չունենք ցանկություն` արձանագրությունների ինքնանպատակ գոյությունը պահպանելու: Սա, կարծում եմ, պիտի հստակ լինի բոլորի համար: Առիթ ենք ունեցել բազմիցս կրկնելու եւ մեկ անգամ եւս ուզում եմ նշել՝ Թուրքիայի հետ որեւէ քայլ չի կարող հարցականի տակ դնել ցեղասպանության եւ դրա արդյունք հանդիսացող՝ հայրենազրկման միջազգային ճանաչման ու դատապարտման ուղղությամբ մեր ակտիվ գործունեությունը»,- ասել է Սերժ Սարգսյանը:
Leave a Reply