Բեռլինում տեղի է ունեցել Հասան Ջեմալի «Հայոց ցեղասպանությունը» գրքի շնորհանդեսը

Բեռլինի Humboldt համալսարանում «Թուրքիան 21-րդ դարում-Network Turkey» ծրագրի շրջանակում առաջին անգամ տեղի է ունեցել թուրք լրագրող, գրող Հասան Ջեմալի «1915թ. Հայոց ցեղասպանությունը» գրքի շնորհանդեսը, որը շուկայում հայտնվել է անցյալ հոկտեմբերին: Հասան Ջեմալը Հայոց ցեղասպանությունը ծրագրողներից եւ իրագործողներից մեկի` Ջամալ փաշայի թոռն է: Այս մասին, ինչպես հաղորդում է «Արմենպրես»-ը, հայտնում է թուրքական «Ջիհան» լրատվական գործակալությունը:

Շնորհադեսին ունեցած ելույթում Հասան Ջեմալն ասել է, որ թուրքական որեւէ հեռուստաալիքի կամ ռադիոյի մինչ այժմ գրքի լույս ընծայման հետ կապված որեւէ հարցազրույց չի տվել: Նա հայտարարել է, որ գիրքը նվիրում է 6 տարի առաջ Ստամբուլում սպանված «Ակօս» թերթի հայազգի խմբագրապետ Հրանտ Դինքի հիշատակին: Ելույթում նա Հայոց ցեղասպանության հարցում տարբեր կարծիքներ արտահայտող անձանց հիշեցրել է Հրանտ Դինքի` «կարեւորը ընկալելն ու հասկանալն է, ոչ թե ժխտումն ու ճանաչումը» արտահայտությունը:

«Այս գրքով ես ցանկացել եմ միաժամանակ բացատրել նաեւ Թուրքիայի Հանրապետության ստեղծումը, ազգային պետության, թուրքական ազգայնականության ինչ լինելը եւ մինչ օրս կախված մնացած քրդական խնդիրը, Հայկական հարցը, զինվորականության խնդիրը», -ասել է նա:

Թուրք լրագրողը ելույթում հիշեցրել է նաեւ մի քուրդ մտավորականի հետեւյալ խոսքերը. «Քրդերը տարիներ շարունակ հայտարարում են, որ մշտապես ապրել են Անատոլիայում, իսկ բնիկ ժողովուրդ հայերը սպանվել են»:

http://armenpress.am/arm/news/705683/berlinum-texi-e-unecel-hasan-jemali–hayoc-cexaspanutyuny.html