Ստամբուլում քաղաքացիական հասարակական բազմաթիվ կազմակերպությունների անցկացրած` «Հրանտի բարեկամները խոսում են 1915-ի մասին` նրա թողած տեղից» թեմայով խորհրդաժողովում ունեցած ելույթում թուրք գրող, սոցիոլոգ Իսմայիլ Բեշիքչին հայտարարել է, որ «հայերն ու քրդերն այս աշխարհագրության բնիկ ժողովուրդներն են»: Այս մասին, ինչպես հաղորդում է «Արմենպրես»–ը, հայտնում է թուրքական ilkehaber.com լրատվական կայքը:
«Այս հողերի օտար ժողովուրդը թուրքերն են: Հայերն ու քրդերն այս աշխարհագրության բնիկ ժողովուրդներն են: Թուրքերը ցեղասպանել են հայերին, հույներին աքսորել` արդունաբերության ազգայնացման անվան տակ, քրդերին էլ տալով հայերից մնացած ապրանքները` ասել են` «Դուք թուրք եք», -հայտարարել է նա:
Բեշիքչիից հետո ելույթ ունեցած Հրանտ Գասպարյանը նշելով, որ Թուրքիայում իշխանություններն այն ըմբռնումն են ստեղծել, թե պետությունը պատկանում է միայն թուրքերին, ասել է. «Այն մարդիկ, ովքեր քաջություն են ունենում ասելու, որ այս պետությունը միայն թուրքերին չի պատկանում, լռեցվում են` սպանվելով Հրանտ Դինքի նման: Թուրքիայում համակարգված կերպով ճնշում են փոքրամասնություններին եւ ոչ թուրքերին: Թուրքերը բռնազավթել են հայերի եւ հույների ունեցվածքը»:
Հանդիպման բացման խոսքում Սիբել Օզբուրունն ասել է. «Հայերի նկատմամբ ցեղասպանության եւ կոտորածների մտածելակերպը Թուրքիայում շարունակվում է, ինչի ցուցադրությունը Ստամբուլի Թաքսիմ հրապարակում փետրվարի 26-ի բողոքի ցույցի ժամանակ հակահայկական դրսեւորումներն էին»:
Գրող Ֆիքրեթ Բաշքայան նշելով, որ կոտորածների հիմնական նպատակն ազգային պետության ըմբռնումն է եղել, ասել է, որ Թուրքիայում պաշտոնական պատմությունը միտումնավոր աղավաղվել է:
Գիտնական Բասքըն Օրանն էլ հայտարարել է. «Թուրքերին եւ հայերին լավ ճանաչող Հրանտ Դինքն ախտորոշել է թուրքերի պարանոյան եւ հայերի տրավման: Երրորդ կողմ չդարձած Հրանտը հավատում էր, որ այս հարցը պետք է լուծեն երկու կողմերը»:
Leave a Reply