Րաֆֆի Հովհաննիսյանը՝ փետրվարի 18-ի նախագահական ընտրություններում ՀՀ նախագահ Սերժ Սարգսյանի ամենաականավոր հակառակորդը, հայտնել է, որ ինքը 1915-ի ցեղասպանությունից փրկվածների ժառանգ է. գրում է թուրքական Hurriyet-ը (Hurriyet Daily News-Ակունքի խմբ.): Հովհաննիսյանը, ըստ աղբյուրի, մասնավորապես հայտնել է, որ իր նախնիներին փրկել են ոչ քրիստոնյաներ:
«Մորս ընտանիքը Կարինից է, իսկ հորս ընտանիքը Հարպուտից (Խարբերդ-Ակունքի խմբ.): Իմ Խնկենի տատին Ցեղասպանությունից թուրք ընտանիք է փրկել Էրզրումում (Կարին-Ակունքի խմբ.): Գասպար պապիս Հարպուտում մի քրդական ընտանիք է փրկել»,- մանրամասնել է Հովհաննիսյանը՝ հայտնելով, որ ինքը հաճախ է այցելում Արևմտյան Հայաստան:
Hurriyet-ը նշում է, որ ԱՄՆ-ում ծնված պրոֆեսոր Ռիչարդ Հովհաննիսյանի որդի Րաֆֆին Հայաստան է եկել 1988 թ.՝ ավերիչ երկրաշարժից հետո փրկարարներին օգնելու նպատակով, և 2 տարի անց որոշել է մշտական բնակություն հաստատել երկրում:
Խոսելով Թուրքիայի հետ հարաբերությունների մասին՝ Րաֆֆի Հովհաննիսյանը Hurriyet-ին ասել է, որ Թուրքիայի կողմից 1915 թ. կատարվածը Ցեղասպանությունը ճանաչելը պարտադիր կդառնա, եթե ինքը նախագահ ընտրվի:
«Թուրքիան, իր սեփական կարիքներից ու շահերից ելնելով, պետք է ճանաչի Հայոց ցեղասպանությունը և հայ ժողովրդի արտաքսումը, ամբողջական վերականգնում և հետևանքների փոխհատուցում կատարի, վերականգնի հայերի մշակութային ժառանգությունը և վերադարձի իրավունք ապահովի», – հավելել է նա:
Նա ասել է նաև, որ Ցեղասպանության ժամանակ հայերին փրկած թուրքերին կհիշեն 2015 թ.՝ Ցեղասպանության 100-ամյա տարելիցին:
Աղբյուրը նշում է, որ Հովհաննիսյանը ԶԼՄ-ների ուշադրությունը գրավեց 2 տարի առաջ, երբ հացադուլ արեց Սերժ Սարգսյանի դեմ:
Այդ առիթով էլ Հովհաննիսյանն ասել է. «Դա ծոմ էր հանուն ազատության, օրենքի գերիշխման և իրավունքների գերակայության»:
http://tert.am/am/news/2013/01/20/hurriyet-raffi-hovhannisyan/
Leave a Reply