Թուրքիայի խոշորագույն քաղաքում` Ստամբուլում, հունվարի 19-ին հարգել են «Ակօսի» խմբագրապետ, հասարակական գործիչ Հրանտ Դինքի հիշատակը:
Հազարավոր մարդիկ հավաքվել են Շիշլի թաղամասում գտնվող «Ակօսի» խմբագրատան առաջ, որտեղ էլ 2007 թ. հունվարի 19-ին թուրք ազգայնական երիտասարդի կրակոցներից սպանվել էր Դինքը:
«Այստեղ ենք, եղբա’յր». նման նշանաբանով են հավաքվել Դինքի հիշատակը հարգող քաղաքացիները:
«Առանց մեր կողմից «փակվեց» ասելու` այս գործը չի փակվելու»,-հայտարարել են «Դինքի ընկերներ» խմբի անդամները, որոնք 6-րդ տարին անընդմեջ Ստամբուլի կենտրոնում հարգանքի տուրք են մատուցել պոլսահայ գործչին և բողոքի ձայն բարձրացրել նրա սպանության գործով դատավարության ընթացքի դեմ:
Նշենք, որ թեև Դինքի գործով շարունակվող երկարատև և մեծ քննադատությունների արժանացած դատավարության արդյունքում ճաղերի հետևում հայտնվեցին նրա սպանությունն իրականացրած խմբի մի քանի անդամներ, սակայն իրականում Դինքի սպանության հետևում կանգնած ուժերն այդպես էլ պատասխանատվություն չկրեցին:
Leave a Reply