Թուրքիայում փոքրամասնություն կազմող համայնքների անդամները պահանջում են թուրքական իշխանություններից` քրիստոնյաներին մահմեդականների իրավունքներին հավասար իրավունքներ տալ թաղման արարողություններն իրականացնելիս: Ինչպես հաղորդում է «Արմենպրես»-ը`այս մասին տեղեկացնում է թուրքական Hurriyet Daily News պարբերականը:
Թուրքիայի քաղաքապետարանները ոչ մահմեդականներին չեն ապահովում անվճար ծառայություններով, մասնավորապես, թաղման մեքենաների տրամադրմամբ: Գերեզմանոցներում հողատարածքները մահմեդականներին ցածր գներով են տրվում, ինչը չի կարելի ասել ոչ մահմեդականների պարագայում:
Թուրքական պարբերականի հետ զրույցում Ստամբուլի քաղաքապետարանի` գերեզմանների տնօրինության անդամներից մեկը նշել է, որ իրենք որեւէ կերպ չեն խոչընդոտում ոչ մահմեդականների կողմից թաղման արարողությունների իրականացմանը, սակայն չեն էլ աջակցում: «Նրանք կարող են թաղման արարողություններն իրականացնել համաձայն սեփական կրոնի և ավանդույթների: Մենք որևէ կերպ չենք միջամտում նրանց գործերին, քանի որ որևէ կապ չունենք նրանց ավանդույթների և արարողությունների հետ: Մենք միջամտում ենք միայն այն դեպքում, երբ նրանք իրենց հավատն են հայտնում իսլամի նկատմամբ»,- նշել է նա:
Հունական եկեղեցու հիմնադրամի ներկայացուցիչ Անդոն Փարիսյանոսը նշել է, որ Թուրքիայի Կրոնական գործերի վարչությունը ոչ մի կերպ չի աջակցում իրենց անգամ եկեղեցու կոմունալ վարձերը վճարելու գործում, հետևաբար խոսք անգամ չի կարող գնալ թաղման արարողությունների ժամանակ աջակցելու մասին:
Ստամբուլի Յեշիլքյոյի հայկական դպրոցի տնօրեն Կարո Պայլանը նշել է, որ պետք է պահանջել քաղաքացիական հավասար իրավունքներ: «Կրոնական գործերի վարչությունը կարող է ստեղծել հատուկ հիմնադրամներ, որոնք պատրիարքարանի միջոցով գումարները կփոխանցեն թաղման արարողություններ կազմակերպող ծառայություններին»,- առաջարկել է նա:
http://armenpress.am/arm/news/705341/turqiayum-och-mahmedakan-poqramasnutyunnery-havasar.html
Leave a Reply