Մահացել է Մեհմեթ Ալի Բիրանդը

Այս մասին հայտնում են թուրքական լրատվամիջոցները: «Kanal D» լրատվական բաժնի ղեկավար, հայտնի լրագրող, վերլուծաբան Մեհմեթ Ալի Բիրանդը նախօրեին ամերիկյան մասնավոր հիվանդանոցում ենթարկվել էր լեղապարկի վիրահատության, որի ժամանակ ունեցել էր սրտի կանգ: Բժիշկների ջանքերով սրտի աշխատանքը վերականգնվել է: Այնուհետև, սակայն, Բիրանդի մոտ արձանագրվել է գլխուղեղի մահ:

Մեհմեթ Ալի Բիրանդը ծնվել է 1941-ին Ստամբուլում: Լրագրությամբ սկսել է զբաղվել 1964-ից թուրքական «Միլլիյեթ» (Milliyet) օրաթերթում: Հետագայում վարել է մի շարք խորագրեր ու սյունակներ տպագիր և էլեկտրոնային մամուլում: Հեղինակել է մի շարք հեռուստահաղորդումներ, որոնք լայն մասսայականություն են վայելել:

Իր ծագման մասին խոսելով` Մեհմեթ Ալի Բիրանդը նշել է, որ ինքը ասիմիլացված քուրդ է, սակայն իրեն հաճախ հայ են անվանում: «Ինձ հաճախ հայ են անվանում: Ես, իհարկե, հայ չեմ, իսկ եթե լինեի էլ, ապա դրանով միայն կհպարտանայի»,-ասել է Մեհմեթ Ալի Բիրանդը:

http://ermenihaber.am/?lang_id=2&news_=4&cur_news=357