Թուրքիայում քրիստոնյա հոգեւորականի դեմ մահափորձ է կանխվել

Թուրքիայի Քոջաելի նահանգի ոստիկանության ահաբեկչության դեմ պայքարի բաժնի աշխատակիցները կանխել են Իզմիթի բողոքական եկեղեցու պաստորի դեմ մահափորձը։

Թուրքական Cihan գործակալության փոխանցմամբ՝ Քոջալի նահանգի ոստիկանները 3 քաղաքներում իրականացրած գործողությունների  արդյունքում ձերբակալել են 13 հոգու, ովքեր Իզմիթի բողոքական եկեղեցու պաստորի դեմ մահափորձ էին կազմակերպում։

Ոստիկանությունը տեղեկություններ էր ստացել որ որոշ մարդիկ հետեւում են եկեղեցու պաստորին, տեղեկություններ հավաքում նրա վերաբերյալ, իսկ մահափորձի կազմակերպիչներից մեկը նույնիսկ քրիստոնյայի պես գնացել է եկեղեցի եւ մասնակցել պատարագի։

Նշենք, որ 5 տարի առաջ կրկին Քոջաելիի բողոքական եկեղեցու պաստորի դեմ մահափորձ էր կանխվել։ Այդ ժամանակ ոստիկանության գործողությունների արդյունքում ձերբակալվել էին 28 հոգի։ 

http://news.am/arm/news/136125.html