Բրիտանական «Ֆայնենշնլ թայմս» թերթն անդրադարձել է Փարիզում երեք քուրդ կին քաղաքական գոծիչների սպանությանը եւ նշել, որ «թուրքերը երկյուղում են տարածաշրջանում քրդական պետության ստեղծվելուց»: Սպանվածների մեջ է եղել Քուրդիստանի աշխատավորական կուսակցության (ՔԱԿ) հիմնադիրներից Սաքինե Ջանսըզը: Թերթը հայտնել է, որ Օսլոյում Թուրքիայի կառավարության ներկայացուցիչների հետ քրդական խնդրի լուծման շուրջ տեղի ունեցած հանդիպումներում ՔԱԿ-ի պատվիրակության կազմում եղել է նաեւ Ջանսըզը:
Ինչպես հաղորդում է «Արմենպրես»–ը, բրիտանական թերթը գրել է, որ Փարիզի մահափորձերի իրական նպատակը Սաքինե Ջանսըզին վերացնել էր, քանի որ Օսլոյում սկսված հանդիպումները վերջին շրջանում վերածվել են թուրքական հետախուզության` Իմրալի բանտում ցմահ բանտարկություն կրող ՔԱԿ առաջնորդ Աբդուլլա Օջալանի հետ ուղղակի բանակցությունների առնչությամբ:
«Վարչապետ Էրդողանի կառավարությունը խոստացել է, որ եթե ՔԱԿ-ը դուրս գա 1984 թ-ից շարունակվող զինված պայքարից, որն արդեն նվազագույնը 40 հազար մարդու կյանք է խլել, Թուրքիայում կընդլայնվեն քրդերի լեզվական, մշակութային իրավունքները, քրդաբնակ շրջանների ինքնակառավարվելու շրջանակները: Այդ տեսակետից միանգամայն ակնհայտ է, որ Սաքինե Ջանսըզի սպանությունը կազմակերպել են Թուրքիայի «խորքային պետության» մեջ թաղված ծայրահեղ ազգայնականները կամ էլ ՔԱԿ-ի ներսում գտնվող մերժողական ուժերը: Մոտ 100 տարի առաջ Օսմանյան կայսրության փլուզումից հետո կատարված տարածաշրջանային բաժանման ժամանակ համակիր քրդերն այժմ կարծում են, որ այդ ցավալի սխալն ուղղելու պատմական առիթ ունեն իրենց ձեռքում: Անկարայում ուշի ուշով հետեւում են, թե իրաքյան Քուրդիստանի առաջնորդ Մասուդ Բարզանին ինչպես է աշխատում քրդական ինքնավարությունը տարածել նաեւ Սիրիայում: Այդ պատճառով է, որ նման իրավիճակի արդյունքները կարող են շատ ծանր լինել կայսրության փլուզումից հետո ներկայիս սահմաններով քննություն անցած Թուրքիայի համար, ինչի բանալին Անկարայի ձեռքում է: Թուրքերը խիստ վախենում են, որ սիրիական իրադարձությունները կարող են հանգեցնել իր քրդաբնակ հարավարեւելյան տարածաշրջանում անկախ քրդական պետության ստեղծմանը: Չի բացառվում, որ Փարիզում կատարված նման սպանություններ այսուհետ էլի կլինեն: Էրդողանի Թուրքիան պետք է կարողանա գտնել այդ վտանգը կանխելու, ինչպես նաեւ տարածաշրջանում դեմոկրատական առաջնորդ լինելու համար իր սահմաններում բնակվող քրդերի պահանջները բավարարելու ճանապարհը: Սա ոչ միայն Սիրիայում եւ Իրաքում, այլ նաեւ ժամանակավոր իրարանցման մեջ գտնվող ամբողջ տարածաշրջանում բոլոր փոքրամասնությունների օրինական իրավունքները ճանաչելու հարցում կարեւոր քաղաքական եւ բարոյական առաջնորդություն կապահովի Անկարային», -հայտնում է թերթը:
Leave a Reply