Ամերիկացի պատմաբանը Սիրիայի հարցում Օբամայի ձեռքով թուրքերի համար կործանում է կանխատեսում

Ամերիկացի պատմաբան Գրայֆին Թարփլին Թուրքիայի եւ Սիրիայի հարցում կատարած իր վերլուծության մեջ, որը մեծ տարածում է գտել սոցիալական ցանցերում, հայտարարել է. «Օբաման խաբում է Էրդողանին, թուրքերը պարտվելու են»:

Ինչպես հաղորդում է «Արմենպրես»–ը` վկայակոչելով թուրքական «Հաբեր3» լրատվական կայքը, վերլուծության մեջ նշելով, որ «Օբաման ամեն շաբաթ հեռախոսազրույց է ունենում Էրդողանի հետ եւ, խաղալով նրա ինքնասիրության, մեծամտության եւ շահամոլության հետ, «գցում» է նրան», Թարփլին ասել է. «Մուբարաքին տապալելուց հետո թուրքական կառավարությունը գայթակղվել է նոր Օսմանյան կայսրության գաղափարով: Այս խորամանկ խաբկանքով Թուրքիան իր «զրո խնդիր հարեւանների հետ» կարգախոսով եւ քրդական խնդրի գլխավորությամբ հայտնվել է տասնյակ հարցերի «սերիալում»: 

Թուրքական հասարակությանը ցնցած վերլուծության մեջ Թարփլին գրում է. «Ըստ Սիմոն Հերսի` Քուրդիստանի աշխատավորական կուսակցությունը (PKK) ԱՄՆ-ի Կենտրոնական հետախուզական վարչության (CIA) կողմից աջակցվող կազմակերպություն է: CIA-ն PKK-ին օգտագործում է Իրանի դեմ: Նախկինում Ֆրանսիայի նախագահ Միտերանի կինը` Դանիելա Միտերանը, PKK-ի պահապան հրեշտակն էր: Մեկ տարի առաջ, Իսրայելի արտաքին գործերի նախարար Լիբերմանը Մավի Մարմարա նավի միջադեպի հետ կապված Թուրքիային պատժելու համար հայտարարեց, որ աջակցելու է PKK-ին: Տեղեկություններ կան, որ ՆԱՏՕ-ն Հունաստանի միջնորդությամբ աջակցում է PKK-ին: Այդ պատճառով, Անկարան պետք է հասկանա, որ դրա նպատակը Թուրքիայի վերացումն է:

Թուրքերն առաջին հերթին պետք է հասկանան, որ ԱՄՆ-ի եւ Մեծ Բրիտանիայի հետ իրենց դաշինքը «սպանիչ գրկախառնություն է»: Այլ խոսքով` անգլո-ամերիկացիները թուրքերին սիրելու են մինչեւ սպանելը: Թուրքերին օգտագործելու են Սիրիայի դեմ, եւ այդ բախումն օգտագործելու են ժամանակակից Թուրքիան վերացնելու համար: Վախենամ, որ Օբամայի կողմից խաբվող Էրդողանն ու Դավութօղլուն իրենց այդ հոգեբանությամբ սեփական փոսն են փորում: Նրանք շահելու ոչ մի բան չունեն, այլ կորցնելու են: 

Թուրք-ռուսական պատերազմը դռան շեմին է: 19-րդ դարում ամեն 20 տարին մեկ թուրք-ռուսական պատերազմ է եղել: Վերջին շրջանում թուրք-ռուսական պատերազմ չեղավ, բայց այդ ուղղությամբ քայլեր կատարվում են: Պետք է տեսնել, որ Սիրիայի անվտանգության ուժերը ապստամբների դեմ հաջող գործողություններ են իրագործում, ապստամբությունը ճնշվում է: Դրան զուգահեռ` իրադարձությունների ծանրության կենտրոնը սահում է դեպի իրական հեղափոխական շարժում սկսված Սաուդյան Արաբիա եւ Քաթար:

Ներկա դրությամբ թուրքերն իրենց ամբողջ հարավային շրջանները հանձնել են CIA-ին: Այնտեղ CIA-ն գործում է անթաքույց եւ առանց վերահսկողության: Իսքենդերունի հյուրանոցներում CIA-ի աշխատակիցներ են բնակվում: Հյուրանոցները լի են Ալ Ղաիդայի ահաբեկիչներով: CIA-ն օգտագործում է Ադանայի մոտ գտնվող Ինջիրլիքի ռազմաբազայից տարածաշրջան բերած իր ահաբեկիչներին: Եվ դրա շրջադարձը Թուրքիա աղետալի կլինի»:

http://armenpress.am/arm/news/704946/amerikaci-patmabany-siriayi-harcum-obamayi-dzerqov-turqeri.html