Ներկայում Եւրոպայում բնակվող` Թուրքիայի Դերսիմի շրջանի բնակիչները Միջազգային քրեական դատարան հայց են ներկայացրել ընդդեմ այն անձանց, ովքեր պատասխանատու են հիմնականում ալեւիներով բնակեցված այդ շրջանում տեղի ունեցած արյունահեղության համար:
Ինչպես հայտնում է «Nouvelles d`Arménie»-ն, Դերսիմի նախկին բնակիչները, ովքեր ներկայում բնակվում են Գերմանիայում, Ֆրանսիայում, Բելգիայում եւ Հոլանդիայում, բողոքի ակցիա են իրականացրել Հաագայի դատարանի շենքի առջեւ. նրանց ձեռքի պաստառներին գրված է եղել. «Մենք արդարադատություն ենք ուզում Դերսիմում տեղի ունեցած ցեղասպանության համար»: Նրանք 300 էջանոց հայց են ներկայացրել: Դերսիմցիների փաստաբան Էրդալ Դողանը հայտարարել է, որ եթե հայցը չընդունվի, իրենք կդիմեն ՄԱԿ-ի մարդու իրավունքների խորհրդին:
Նշենք, որ 1937-38 թվականներին հիմնականում ալեւիներով բնակեցված Դերսիմի շրջանում թուրքական զինված ուժերն սպանել են մինչեւ 70 հազար ալեւիների:
Leave a Reply