Նոր մանրամասներ Թուրքիայում հայկական վարժարանի ուսուցչի սպանության մասին

Թուրքական մամուլում տարածված այն տեղեկությունը, թե Ստամբուլում սպանվել է հայազգի ուսուցիչ, ինչպես արդեն տեղեկացրել ենք, իրականությանը չի համապատասխանում։ Փաստն այն է, որ նախօրեին սեփական բնակարանում սպանված վիճակում հայտնաբերել են 40-ամյա Իլքեր Շահինի դին, ում նկատմամաբ բռնություններ են կիրառվել եւ կտրել են նրա պարանոցը։

Շահինը դասավանդել է Սկյուտարի հայկական Արամյան երկրորդական վարժարանում։ Կրթական հաստատության տնօրինությունը “Երկիր Մեդիային” փոխանցեց, որ նա ազգությամբ թուրք է։

Մեկ տարի առաջ կնոջից բաժանված եւ մեկ զավակ ունեցող Շահինը ծննդյան տոներից հետո աշխատանքի չի հաճախել եւ չի պատասխանել հեռախոսազանգերին, որից հետո էլ ընկերները գնացել են նրա բնակարան եւ հայտնաբերել արդեն սպանված վիճակում։

Ոստիկանությունը հերքել է կողոպուտի պատճառով սպանության իրականացման հնարավորությունը եւ նշել, որ մինչ սպանությունը նա, ամենայն հավանականությամբ, տեւական դիմադրություն է ցուցաբերել:

Թեեւ սպանվածը թուրք է ազգությամբ, սակայն արդեն հնչում են կասկածներ եւ մատնացույց արվում հատկանշական զուգադիպություններ։ Օրերս սպանվել էր 85-ամյա հայազգի Մարիցա Քյուչուքը, ում կյանքից զրկել էին նույն մեթոդով, եւ ըստ որոշ տեղեկությունների, կրծքին էլ պատկերել էին խաչի նշան։ Հայ համայնքն այդ սպանությունից հետո պարզաբանումներ էր պահանջել պետական կառույցներից, սակայն նրանք առայժմ լռում են։

http://www.yerkirmedia.am/?act=news&lan=hy&id=11611