Մի սպայի կողմից Թուրքիայի Ազգային հետախուզական կազմակերպությանը հղված նամակում տեղ են գտել խիստ ուշագրավ տեղեկություններ և մանրամասներ:
«Վաթան» օրաթերթն իր առաջին էջում հրապարակել է Թուրքիայի Ազգային հետախուզական կազմակերպության` Խորհրդարանի դեմ հեղաշրջումների ուսումնասիրությունների հանձնաժողովին հղված փաստաթղթերի միջից գտնված և, ենթադրաբար, Ազգային հետախուզական կազմակերպության նախկին խորհրդական Էմրե Թաներին ուղղված խիստ ուշագրավ մի նամակ:
Լրագրող Դենիզ Գյուչերի հեղինակությամբ լույս տեսած սույն հրապարակման մեջ հիշատակվող նամակում պնդվում է, թե այնպիսի դեպքերի հետևում, ինչպիսիք են` Դինքի սպանությունը, Պետխորհրդի (Danıştay) վրա հարձակումը, միսիոներների սպանությունները, կանգնած է Թուրքիայի զինված ուժերի Զորահավաքի վարչությունը: Ըստ պնդման` 2.500 պարտիզաններ ունեցող վերոնշյալ հաստատությունն ունի զանազան վայրերում թաղված ռազմամթերքի պահեստներ, որտեղ զենք ու զինամթերք են գտնվում: Հատուկ ռազմական գրասենյակում պաշտոնավարած այդ սպայի նամակի բովանդակության մեջ նշվում է.
«Հարգելի’ Էմրե Թաներ բեյ, հարգելի’ խորհրդական… Ես պետական պաշտոնյա եմ: Այս նամակը Ձեզ եմ գրում` իմացածներս Ձեզ հետ կիսելու և մեր հաստատության մասին իմ տեղեկություններին գնահատական տալու միջոցով հավանական խնդիրներին արգելք դառնալու գաղափարից ելնելով: Հրանտ Դինքի սպանությունը, Պետխորհրդի վրա հարձակումը, քահանաների սպանությունները, Մալաթիայի հրատարակչատան վրա հարձակումը և դեռ քանի-քանի այլ գործողությունների և դեպքերի հետնաբեմում կանգնած է գործողությունը ծրագրող, առաքող և ղեկավարող Զինված ուժերին ենթակա մի հաստատություն` Զորահավաքի վարչությունը:
Զորահավաքի վարչությունն ունի հետևյալ 3 գլխավոր տեղամասերը.
1. Տրապիզոնը, որտեղ մարդկանց ազգայնական զգացումների վրա հիմնված գործողություններ են ծրագրվել: Քահանաների սպանությունները, TAYAT-ի գործողությունները, Դինքի սպանությունը սույն շրջանում տեղակայված կազմակերպության աշխատանքներն են:
2. Հաթայը. շուտով այս շրջանում ասորական և հայկական հարցերով մեծ աշխուժություն է սկսվելու: Հատկապես ԱՄՆ-ի Սորոս կենտրոնում տեղակայված հաստատությունների հետ իրականացվող համատեղ նախագծով` սույն շրջանում տեղի է ունենալու հայ-թուրք-ասորական ընդհարում:
3. Մալաթիա. սույն շրջանում աշխատանք է տարվում` այստեղ մեծ թիվ կազմող դերվիշական միաբանությունները (tarikat) ահաբեկչական կազմակերպության վերածելու ուղղությամբ:
Այս կենտրոններում պաշտոնավարող Թուրքիայի զինված ուժերի անդամների ենթակայության տակ առկա է մի կազմակերպություն-կառույց, որը բաղկացած է 3 հիմնական և 1 պահեստային կադրից:
A- Սպիտակներ (Քաղաքի ընդհատակյա կադր)
B- Սևեր (Պարտիզանական կադր: Ընտրվում է սպաներից և շարքայիններից: Նրանց թիվը մոտ 2.500 է)
C- Կանաչներ (Գործերի մասին տեղեկացվող, սակայն կազմակերպության մեջ չընգրկվող անձինք: Մոտ 100 հոգի են: Նրանք օգտակար են լինում տեղեկացվելու և անհրաժեշտ նյութեր տրամադրելու գործում)
D- Նարնջագույներ (Որևիցե ամոթալի պատճառով կազմակերպությունից հեռացված անձինք: Մոտ 350 հոգի են: Եթե հետապնդման և դատական խնդիրներ չունեն, նրանց շարունակում են գործեր հանձնարարել: Նրանց հետ կապը մինչև մահ պահպանվում է):
Հարգելի’ խորհրդական, ծրագրվում է երկրի ներսում Զորահավաքի շրջանային վարչության թիվը 12-ից հասցնել 24-ի: Ես շատ լուրջ մտահոգություններ ունեմ` շրջանային վարչությունների մեջ ընդգրկված քաղաքացիական անձնակազմի առնչությամբ: Այդ քաղաքացիական անձնակազմի մեծ մասը հասարակության մեջ չի տարբերվում պատրույգը վառված ռումբից:
Շրջանի պատասխանատուները բաժանվում են «անձինք, որոնցից պետք է ազատվել», «օգտակար անձինք», «վնասակար անձինք» կատեգորիաների մեջ: Մի շրջանի չափանիշների համաձայն` որպես «լավ» են պիտակավորվում, իսկ մեկ այլ շրջանի չափանիշներով` «վատ»: Զորահավաքի շրջանային վարիչներին ենթակա քաղաքացիական անձինք ևս տեղյակ են, որ տարբեր վայրերում թաղված զենքի և զինամթերքի ռազմական պահեստներ կան: Անհնար է դրանք բոլորը տևական հսկողության տակ պահել: Գոյություն ունեն նաև «օգտակար» և «վնասակար» անձանց անունները: «Վնասակար անձինք», մեծավ մասամբ, Թուրքիայի կոմունիստական կուսակցության «ձախակողմյան խմբերի անդամներն» են»:
Նամակի հեղինակ անանուն սպան հայտնել է նաև որոշ անձանց անուններ, ովքեր բնութագրվել են որպես «սպիտակ» կամ «սև»:
Ջիհան լրատվական գործակալություն
Թարգմանեց Մելինե Անումյանը
Akunq.net
Leave a Reply