Հայ կինոռեժիսորը Թուրքիայում ցույց կտա հայկական Պոլիսը

Լուսինե Մուսայելյան

Սփյուռքահայ կինոռեժիսոր Նիկոլ Բեզջյանի ֆիլմը կցուցադրվի Ստամբուլի անկախ ֆիլմերի փառատոնում։ Առաջին անգամ այս փառատոնի շրջանակներում կցուցադրվի միֆիլմ, որում խոսվում է հայերի ցեղասպանության, Ստամբուլ քաղաքի հարուստ հայկական անցյալի մասին։

Լիբանանահայ ժամանակակից սփյուռքահայ երիտասարդի մասին պատմող ֆիլմը վերնագրված է՝ «Կոշիկներս Պոլիս ձգեցի»։ Ֆիլմում երիտասարդը 100 տարի հետաձգված ճամփորդություն է ձեռնարկում` վերադարձ իր նախնիների քաղաք Ստամբուլ․ Դանիել Վարուժանի, Զոհրապի քաղաքը:

Նա շրջում է Ստամբուլի հին փողոցներով, որ ժամանակին հայերով էին բնակեցված, հին գերեզմանատներով, ուր պոետներ են հանգչում, հին եկեղեցիներով եւ դարից էլ հին միջնակարգ դպրոցով: Հանդիպում է ահել-ջահելի, հայտնի ու անհայտ մարդկանց, հայ ու թուրքի, լսում նրանց պատմությունները, կարծիքները, ծիծաղում, հաց կիսում նրանց հետ:

Նիկոլ Բեզջյանն «Ազատություն» ռադիոկայանի հետ զրույցում ասում է, որ ֆիլմում քաղաքական ենթատեքստն ակնհայտ է, թեեւ այստեղ ուղղակիորեն քաղաքական հարցեր չեն բարձրացված։

2001 թվականից գործող Ստամբուլի անկախ ֆիլմերի փառատոնն այս տարի կմեկնարկի փետրվարի 14ին։ Տասնօրյա այս փառատոնն ամեն տարի շուրջ 70 հազար հանդիսատես է հյուրընկալում աշխարհի տարբեր անկյուններից։

Անցյալ տարի հենց այս փառատոնի շրջանակներում ցուցադրվեց Լեռնային Ղարաբաղում եւ Հայաստանում նկարահանված Բրեյդեն Քինգի եւ ավստրալացի գրող Դենի Վեյլենտի «Այստեղ» ֆիլմը, որում ներկայացված է ամերիկացի քարտեզագրման ինժեների եւ ծագումով հայ լուսանկարչուհու ռոմանտիկ պատմությունը:

http://www.azatutyun.am/content/article/24820494.html