Դինքի սպանության գործում նոր շրջադարձ է «հայտնվել»` դարձյալ սպանության տարելիցի նախաշեմին

Պատահականությո՞ւն է, թե՞ ոչ, սակայն այսօր հայտնի է դարձել պոլսահայ խմբագիր Հրանտ Դինքի սպանության գործում նոր շրջադարձի մասին։ Այդ երկրի Գլխավոր դատախազությունը վերանայելու է նախկինում արձակված դատավճիռը։

Իրավապահները հիմա պնդում են, որ սպանությունը եղել է կազմակերպված, նախապես պլանավորված եւ մշակված սցենարով իրականացված, ձեւավորված կառույցի ձեռքի գործ։

Սա ամբողջությամբ փոխում է Դինքի սպանության գործով ավարտված դատաքննության ընթացքը։

Հիշեցնենք, որ 2012 թվականի ճիշտ այս օրերին՝ հունվարի 17-ին, Ստամբուլի առաջին ատյանի 14-րդ դատարանը Հրանտ Դինքի գործով ցմահ ազատազրկման էր դատապարտել գլխավոր մեղադրյալ Յասըն Հայալին, ով դատաքննության ավարտին հայտարարել էր, թե իրեն մարդասպան է դարձրել թուրքական պետությունը։ Գործով անցնող մի քանի անձինք եւս դատապարտվել էին, սակայն կարեւորագույն հարցում վճիռը խիստ բացասաբար ընդունվեց Դինքի ընտանիքի, դատապաշտպանների կողմից։ Դինքի ընտանիքի փաստաբան Ֆեթհիե Չեթինը այդ օրը հայտարարել էր, որ սա նշանակում է «քաղաքական սպանությունների պետական ավանդույթը» միտումնավոր կերպով անփոփոխ թողնել, քանի որ այն չի առնչվում 2007թ. Դինքի սպանությանը պետության ներգրավվածության վերաբերյալ մեղադրանքներին: Դատավճռով չէր ընդունվել սպանությունը կազմակերպված խմբավորման կողմից իրականացված լինելու մասին պաշտպանների միջնորդությունը։

Հատկանշական է, որ հերթական անգամ Դինքի գործով նորություն է հայտնվում, երբ լրանալու է նրա սպանության տարելիցը։

Հունվարի 19-ի կեսօրին, ամեն պարագայում, Սպամբուլում ծրագրվում է կազմակերպել Դինքի հիշատակի հավաք։ «Հրանտի ընկերներ» անվամբ նախաձեռնությունը պատրաստել է անգամ տեսահոլովակ-կոչ։ «Այստեղ ենք՝ ախպարիկ» կարգախոսով, ցուցարարները հավաքվելու են հայաբնակ Շիշլի թաղամասում եւ շարժվելու «Ակօսի» խմբագրատուն, որի դիմաց էլ տեղի ունեցավ անարգ ոճիրը։ Կոչի հեղինակները հիշեցնում են, որ դատավարության ընթացքում չհարցաքննվեց պետական որեւէ պաշտոնյա եւ բարձրաստիճան ոստիկան, մեղադրանք չառաջադրվեց նրանց նկատմամբ, ժամանակին Դինքին թիրախ դարձրած դատավորներից մեկն այսօր արդեն նշանակվել է այդ երկրի Մարդու իրավունքների պաշտպան։

http://www.yerkirmedia.am/?act=news&lan=hy&id=11596