Հայ-թուրքական հարաբերություններն այս պահին գտնվում են ավելի վատ վիճակում, քան նախքան «ֆուտբոլային դիվանագիտությունը»: NEWS.am-ի թղթակցի հետ զրույցում նման տեսակետ հայտնեց ՀՅԴ Հայ դատի եւ քաղաքական հարցերի գրասենյակի ղեկավար Կիրո Մանոյանը:
Նրա խոսքով, այդ հանգամանքը բավական ծանրակշիռ պատճառ է, որպեսզի Հայաստանը դադարեցնի Թուրքիայի հետ հարաբերությունների կարգավորումը` սպասելով, թե երբ այդ երկրում իշխանության կգա քաղաքական ուժ, որը պատրաստ կլինի Երեւանի հետ հարաբերություններ հաստատել առանց նախապայմանների:
Անդրադառնալով քաղաքացիական հասարակության մակարդակով երկու ժողովուրդների հարաբերություններին` Մանոյանը նշեց, որ այդ շփումները իրականություն են դառնում միայն երրորդ կողմերի միջնորդությամբ, իսկ իրականում առաջընթաց չկա: «Երկու երկրների ուսանողներն ու հասարակական կազմակերպությունների ներկայացուցիչները հանգիստ շփվում են, եւ նրանց միջեւ խնդիրներ չեն ծագում, սակայն ողջ խնդիրը Թուրքիայի իշխանությունների քաղաքականության մեջ է: Միաժամանակ Թուրքիան օգտվում է դրանից եւ հայտարարում, որ քայլեր են ձեռնարկվում հարաբերությունները կարգավորելու ուղղությամբ, սակայն դա չի բխում Հայաստանի շահերից»:
Մանոյանի կարծիքով, ստեղծված իրավիճակում Հայաստանը պետք է հետ կանչի իր ստորագրությունը այդ արձանագրություններից` փոխարինելով դրանք երեք կետից բաղկացած փաստաթղթով.
1. երկու երկրները որոշել են դիվանագիտական հարաբերություններ հաստատել,
2. երկու երկրները որոշել են բացել այդ երկրները կապող ճանապարհները,
3. երկու երկրները որոշել են բոլոր հարցերը լուծել խաղաղ ճանապարհով՝ միջազգային իրավունքի եւ միջազգային դիվանագիտական նորմերին համապատասխան:
Leave a Reply