Դինքի գործով գլխավոր վկաները նոր ցուցմունք կտան, դատավարությունը կվերսկսվի

Թուրքահայ լրագրող Հրանտ Դինքի սպանության գործի հետաքննությունը կսկսվի նորից՝ զրոյից, հայտնում է Hurriyet-ը՝ նշելով, որ գործով նոր դատախազ է հանդես գալիս:
Նա՝ Մուամեր Աքքաշը, նոր վկայություններ է հավաքել և պահանջել է նորից հարցաքննել գլխավոր վկաներին:
Ըստ աղբյուրի՝ նաև նոր ցուցմունքներ են տրվել։ Ընդհանուր առմամբ դրանք 10-ն են, այդ թվում՝ ոստիկանների և ժանդարմերիայի աշխատակիցների կողմից:
Աքքաշը եղել է Էրգենեքոնի՝ պետական հեղաշրջման գործով դատավարության դատախազներից մեկը:
Հինգ տարի տևած դատավարությամբ 2012-ի հունվարի 17-ին որոշվել էր, որ պետությունը «մեծ դեր» չի ունեցել այս սպանութան մեջ, չնայած պնդումներին, որ բազմաթիվ պետպաշտոնյաներ են անուղղակիորեն ներգրավված եղել դավադրության մեջ:
Մեկ տարի անց Գերագույն վճռաբեկ դատարանը այլ վճիռ էր կայացրել՝ բողոքարկումից հետո, ինչը հանգեցրել է նոր դատավարությունն սկսելուն:
«Ակօսի» խմբագիր Հրանտ Դինքը սպանվել էր Ստամբուլում իր խմբագրության մոտ 2007-ի հունվարի 19-ին:

http://tert.am/am/news/2013/04/28/dink-case-restarted/