Հայաստանի անկախութեան 35-ամեակի տօնական ձեռնարկներու ծիրին մէջ Փարիզի ԵՈՒՆԵՍՔՕ-ի կենդրոնակայանին մէջ կայացաւ անուանի հայագէտ, լեզուաբան եւ ակադեմիկոս Հրաչեայ Աճառեանի ծննդեան 150-ամեակին նուիրուած գիտաժողով` «Կեանքը գիտութիւն. Հրաչեայ Աճառեան» խորագրով: Գիտաժողովին ներկայ գտնուեցան` կրթութեան, գիտութեան, մշակոյթի եւ մարմնակրթութեան նախարարի տեղակալ Տիգրան Վիրաբեանը, ԵՈՒՆԵՍՔՕ-ի մէջ հաւատարմագրուած դիւանագիտական ներկայացուցիչներ, հայագիտութեան ոլորտին մէջ մասնագիտացող գիտնականներ եւ ուսանողներ:
Կրթութեան, գիտութեան, մշակոյթի եւ մարմնակրթութեան նախարարութեան հաղորդումով, գիտաժողովը նուիրուած էր Աճառեանի գիտական ժառանգութեան արժեւորման եւ հայ լեզուաբանութեան զարգացման գործին նշանակալի աւանդին: Աճառեանի ուսումնասիրութիւնները հայոց լեզուի ծագման, պատմութեան, բարբառներու եւ այլ լեզուներու հետ առնչութեան կարեւոր ներդրում ունեցած են ո՛չ միայն հայագիտութեան, այլեւ` լեզուաբանական համաշխարհային գիտութեան մէջ:
Գիտաժողովը կազմակերպուած էր Հայաստանի կրթութեան, գիտութեան, մշակոյթի եւ մարմնակրթութեան նախարարութեան աջակցութեամբ եւ Մեսրոպ Մաշտոցի անուան մատենադարանի նախաձեռնութեամբ:
Նախօրէին տեղի ունեցաւ նաեւ Հանրապետութեան հրապարակի հիմնադրութեան 100-ամեակին նուիրուած «Հրապարակը եւ ժամանակը. անցեալից ապագայ» խորագրով ցուցահանդէսին բացումը:
Ձեռնարկներու շարքը եզրափակուեցաւ «Հովեր» պետական սենեկային երգչախումբի եւ Վահագն Հայրապետեան թրիոյի միացեալ համերգով:
Յիշեցնենք, որ նախորդ տարի ԵՈՒՆԵՍՔՕ-ի գլխաւոր խորհրդաժողովի 43-րդ նստաշրջանին որոշուած էր հայ ականաւոր լեզուաբան, ակադեմիկոս Հրաչեայ Աճառեանի (1876-1953 թ.) ծննդեան 150-ամեակը, ինչպէս նաեւ Երեւանի Հանրապետութեան հրապարակի շինարարութեան մեկնարկի (1927 թ.) 100-ամեակը ընդգրկել ԵՈՒՆԵՍՔՕ-ի Հռչակաւոր մարդոց եւ կարեւոր իրադարձութիւններու 2026-2027 թուականներու օրացոյցին մէջ:
Leave a Reply