Օկուպացված Արցախում՝ Մարտունիի շրջանում տեղակայված «Ղզըլղայա» ուսումնական կենտրոնում ավարտվող Ադրբեջան-Թուրքիա-Ուզբեկստան համատեղ ռազմական զորավարժությունների շրջանակում կազմակերպվել է «Բարձրաստիճան դիտորդների օր», որի ընթացքում ցուցադրվել է Ադրբեջանի բանակի սպառազինության ընդունված նոր, ինչպես նաև զորավարժությունների ընթացքում կիրառված սպառազինությունը, տեխնիկան, անօդաչու համակարգերը, ավիացիոն միջոցները և այլ հատուկ ռազմական տեխնիկան, ինչին անդրադարձել ենք:
Նշենք, որ «Միության ուժը-2026» զորավարժություններն անցկացվել են 3 փուլով՝ օկուպացված Արցախի տարածքում («Ղզըլղայա» ուսումնական կենտրոն, օկուպացված Մարտունու շրջան), Նախիջևանում («Ղարաբաղլար» ուսումնական կենտրոն), Կասպից ծովի ադրբեջանական հատվածում:
Ռազմական միջոցառմանը մասնակից անձնակազմը կատարել է խնդիրներ՝ կապված կրակային աջակցությամբ հարձակման և զրահատեխնիկայի կիրառմամբ տարբեր տեսակի տեղանքներում մարտական գործողությունների իրականացման հետ։ Բացի այս, խաղարկվել են պայմանական հակառակորդի օդային թիրախներին, ռադիոլոկացիոն կայաններին, զենիթահրթիռային համակարգերին և ռազմական տեխնիկային հարվածներ հասցնելու դրվագներ, նաև՝ պայմանական ահաբեկիչների ցամաքային դիրքերը ոչնչացնելու։
Իսկ ադրբեջանական լրատվամիջոցները հայտնել են, որ սպառազինության ցուցադրություն և զորավարժանքներ եղել են նաև օկուպացված Շուշիում, որին ներկա է եղել Թուրքիայի պաշտպանության նախարար Յաշար Գյուլերը՝ ուղեկցությամբ թուրքական բանակի բարձրաստիճան պաշտոնյաների և Ադրբեջանի զինված ուժերի ղեկավարության: Նա եղել է նաև օկուպացված Մարտունիի շրջանում, և «Բարձրաստիճան դիտորդների օրվա» համատեքստում իր խոսքում նշել է.
Վստահ եմ, որ այսուհետ, երբ մեզ միանան մեր մյուս եղբայրները՝ ղրղըզներն ու ղազախները, միասին կծրագրենք և հաջողությամբ կիրականացնենք առավել լայնածավալ զորավարժություններ։ Եթե ցանկանում ենք խաղաղություն և անվտանգություն, պետք է պատրաստ լինենք պատերազմի: Ուստի մենք դրան պատրաստվելու ենք լավագույնս՝ հաշվի առնելով մեր տարածաշրջանի բոլոր հանգամանքները, բայց ապրելու ենք խաղաղության մեջ»,- շեշտել է Թուրքիայի պաշտպանության նախարարը:
Leave a Reply