Թուրքիայի առաջնորդը նշել է, որ «Մեքքայի համաձայնագիրը» գործելու է ՆԱՏՕ-ի կանոնադրության 5-րդ հոդվածի սկզբունքով։
Sputnik. Թուրքիան չի խուսափի պատերազմից, եթե ինչ-որ մեկը որոշի հարձակվել նրա վրա։ Այս մասին հայտարարել է Թուրքիայի նախագահ Ռեջեփ Թայիփ Էրդողանը՝ մեկնաբանելով Իսրայելի հետ պատերազմի հնարավորությունը։
«Մենք խոսում ենք ոչ թե պատերազմի, այլ խաղաղության մասին։ Սակայն եթե ինչ-որ մեկը մտադիր է հարձակվել Թուրքիայի վրա հանուն պատերազմի, այլ ոչ խաղաղության, Թուրքիան առանց վարանելու կմտնի այդ պատերազմի մեջ և չի խուսափի դրանից։ Ես սա ասում եմ ամենայն պարզությամբ և անկեղծությամբ», – հայտարարել է Թուրքիայի առաջնորդը Al Jazeera-ին տված հարցազրույցում։
Խոսելով Թուրքիայի, Պակիստանի և Սաուդյան Արաբիայի միջև կնքված «Մեքքայի համաձայնագրի» մասին՝ Էրդողանը նշել է, որ փաստաթուղթը կգործի ՆԱՏՕ-ի կանոնադրության 5-րդ հոդվածի սկզբունքով։
«Եթե որևէ խնդիր առաջանա կամ հարձակում լինի, ապա այս երեք պետությունները կկարողանան համատեղ ձեռնարկել անհրաժեշտ քայլերը: Դա կարող է լինել ագրեսիա Թուրքիայի, Սաուդյան Արաբիայի կամ Պակիստանի դեմ՝ անկախ նրանից, թե կոնկրետ որ երկիրը հարձակման կենթարկվի: Եթե այս երեք երկրներից մեկը հարձակման ենթարկվի, ապա, քանի որ նրանց միջև համատեղ պաշտպանության մասին համաձայնագիր գոյություն ունի, բոլոր երեք երկրներն էլ կկարողանան պաշտպանել միմյանց ցանկացած տեսակի ագրեսիայից», – փաստել է Թուրքիայի առաջնորդը։
Ավելի վաղ ԱՄՆ նախագահ Դոնալդ Թրամփը հավանություն էր տվել «Մեքքայի համաձայնագրին» և կարծիք հայտնել, որ այն վկայում է Մերձավոր Արևելքի երկրների համախմբվածության մասին։
Օգոստոսի 7-ին Սաուդյան Արաբիան, Թուրքիան և Պակիստանը ռազմական դաշինք ստեղծելու մասին պայմանագիր են ստորագրել։ Այս համաձայնագիրը ենթադրում է, որ երեք կողմերից որևէ մեկի վրա զինված հարձակումը կհամարվի հարձակում բոլորի վրա։ «Turkiye» թերթի տվյալներով` պաշտպանության մասին համատեղ համաձայնագիրը համագործակցություն է նախատեսում հետախուզական տվյալների փոխանակման և տարածաշրջանային անվտանգության համակարգման ոլորտում։
Leave a Reply