Թուրք և հայ մամուլի ներկայացուցիչների հանդիպումը Հրեշտակների տանը

Թուրք և հայ լրագրողները այցելել են Կարսի խորհրդանշական պատմական շենքերից մեկը՝ «Հրեշտակների տուն» անունով հայտնի առանձնատունը, ծանոթացել կառույցի պատմությանն ու ճարտարապետությանը, ինչպես նաև՝ լուսանկարել շինության յուրահատուկ պատի և առաստաղի զարդարանքները։

Թուրքիա-Հայաստան լրատվամիջոցների երկխոսության և փոխանակման ծրագիրը, որն իրականացվում է «Imagine Center for Conflict Transformation» և «Caucasus Edition» կոնֆլիկտների վերափոխման կենտրոնի կողմից, որը տարիներ շարունակ, Եվրամիության ֆինանսական աջակցությամբ, աշխատում է Թուրքիա-Հայաստան և Ադրբեջան-Հայաստան երկխոսության վրա, Կարսում միավորել է երկու երկրների լրագրողներին։

Ծրագրի երկրորդ փուլի շրջանակներում, որի նպատակն է զարգացնել լրատվամիջոցների միջև ինստիտուցիոնալ համագործակցությունը, լրագրողների միջև անմիջական կապ հաստատել և ամրապնդել փոխադարձ վստահությունը, Հայաստանից ժամանած 8 հոգանոց լրագրողների պատվիրակությունը հնարավորություն է ունեցել մոտիկից ծանոթանալ Կարսի պատմական և մշակութային արժեքներին։ Ծրագրի շրջանակներում լրագրողները այցելել են քաղաքի կենտրոնի կարևոր պատմական շենքեր և նաև ուսումնասիրել «Հրեշտակների տուն» անունով հայտնի պատմական շենքը։ Պատվիրակությունը, որը շենքի մասին տեղեկություններ է ստացել ուղեկցորդներից, լուսանկարել է շենքի հատվածները և ծանոթացել նրա պատմությանը։

Ենթադրվում է, որ շենքը կառուցվել է ռուսների կողմից 19-րդ դարում և օգտագործվել որպես բնակելի տուն․ այն հատկապես ուշագրավ է իր ներքին պատերի և առաստաղի զարդարանքներով: Երկրորդ հարկի դահլիճի պատերը և առաստաղը զարդարված են գրչանկարներով և զարդանախշերով, որոնք արտացոլում են այդ ժամանակաշրջանի գեղարվեստական ​​​​ճաշակը, մինչդեռ առաստաղի վրա գտնվող վեց հրեշտակային պատկերները շենքին տվել են իր անունը՝ «Հրեշտակների տուն»: Մինչ օրս պահպանված որմնանկարների զգալի մասը դեռևս պահպանում է իր ինքնատիպությունը: Համարվելով Կարսի բազմամշակութային անցյալը արտացոլող քաղաքացիական ճարտարապետության կարևոր օրինակներից մեկը՝ տունը վերջին տարիներին դարձել է պատմական տեսարժան վայրերից մեկը, որը գրավում է ինչպես երկրի, այնպես էլ արտասահմանյան այցելուների ուշադրությունը:

Կարս կատարած այցելության ընթացքում լրագրողները դիտարկել են քաղաքի պատմական ժառանգությունը, մշակութային հարստությունը և կարգավորման գործընթացի ազդեցությունը տարածաշրջանի վրա՝ անցկացնելով տարբեր նկարահանումներ և հարցազրույցներ:

https://www.karshakimiyet.com/turk-ve-ermeni-basini-melekli-evde-bulustu-113155h.htm

Թարգմանեց Տիգրան Չանդոյանը

www.akunq.net