Վանի Սուրբ Գևորգ եկեղեցին և հայկական պատմական գերեզմանոցը պահպանության տակ կառնվեն

Վանի Իփեքյոլուի քաղաքապետարանն աշխատանքներ է սկսել Սուրբ Գևորգ եկեղեցին և հայկական պատմական գերեզմանոցը պահպանության տակ վերցնելու նպատակով։ Մասնագետներից բաղկացած հանձնաժողովը ուսումնասիրել է տարածքը, զեկույց գրել այդ մասին, և համապատասխան առաջարկը քաղաքապետարանի խորհրդի կողմից հաստատվելուց հետո կոնկրետ քայլեր կձեռնարկվեն այդ ուղղությամբ։

Այդ մասին, ըստ www.akunq.net –ի, հայտնում են թուրքական լրատվամիջոցները։

Աղբյուրի համաձայն՝ տարածքն ուսումնասիրելիս մասնագետների հանձնաժողովը մեկ առ մեկ հանդիպել է եկեղեցու գտնված թաղամասի թաղապետի և բնակիչների հետ, տեղում հետազոտել է ավիրված կառույցները և լսել քաղաքացիների առաջարկներն ու պահանջները։

Հանձնաժողովի անդամները հավաստիացրել են, որ իրենց աշխատանքները չեն սահմանափակվելու միայն վերոնշյալ եկեղեցով ու գերեզմանոցով․ նրանց նպատակն է լինելու ուսումնասիրել Վանում գտնվող բոլոր պատմական եկեղեցիներն ու գերեզմանոցները։

Մասնագետներն ուսումնասիրություններից հետո մի մանրամասն զեկույց կներկայացնեն Իփեքյոլուի քաղաքապետարանի խորհրդին, որից հետո կոնկրետ քայլեր կձեռնարկվեն պատմական շինությունները պահպանելու ուղղությամբ։

https://www.yenicaggazetesi.com/vanda-tahrip-edilen-saint-kevork-kilisesi-ve-tarihi-ermeni-mezarligi-icin-koruma-hamlesi-1056844h.htm

Թարգմանեց Մելինե Անումյանը

www.akunq.net