Ադրբեջանը մասնակցում է Թուրքիայի և Հայաստանի միջև հարաբերությունների կարգավորման գործընթացին. երկու երկրների միջև սահմանը կբացվի հունիսի 7-ին Հայաստանում կայանալիք խորհրդարանական ընտրություններից և Սահմանադրության փոփոխությունից հետո։ Այս մասին «Cumhuriyet» թերթի հետ զրույցում ասել է Անկարայում Ադրբեջանի դեսպան Ռաշադ Մամեդովը։
Նա ընդգծել է, որ Ադրբեջանը Հայաստանի հետ հարաբերությունների կարգավորման գործընթացում Թուրքիայի հետ համակարգված քաղաքականություն է վարում։
«Մենք Թուրքիայի հետ համաձայնեցված քաղաքականություն ենք վարում, մշտապես կապի մեջ ենք Թուրքիայի արտաքին գործերի նախարարության հետ։ Մենք զուգահեռաբար առաջ ենք տանում Հայաստան-Թուրքիա և Հայաստան-Ադրբեջան հարաբերությունների կարգավորման գործընթացները։ Մենք պայմանավորվում ենք միմյանց հետ, առաջ ենք շարժվում քայլ առ քայլ»,- ասաց նա։
Դեսպանը նշել է, որ հիմնական խնդիրներից մեկը Հայաստանի Սահմանադրության մեջ Ադրբեջանի նկատմամբ տարածքային պահանջների պահպանումն է։
«Հայաստանի Սահմանադրության մեջ տարածքային պահանջներ կան Ադրբեջանի նկատմամբ։ Հունիսի 7-ի ընտրություններից հետո նրանք կփոխեն Սահմանադրությունը, հանրաքվե կանցկացնեն։ Տարածքային պահանջների վերացումից հետո Ադրբեջանի և Հայաստանի միջև կստորագրվի խաղաղության պայմանագիրը, որը նախաստորագրվել է ԱՄՆ-ում։ Դրանից հետո Հայաստանի ու Թուրքիայի կբացվեն սահմանները, ինչպես նաև Հայաստանի ու Ադրբեջանի միջև»,- ասաց նա։
Ռաշադ Մամեդովը նաև ուշագրավ հայտարարություններ է արել՝ մեկնաբանելով Թուրքիայի և Հայաստանի միջև ուղիղ առևտրի մեկնարկը։ Նա հայտարարել է, որ կարգավորման ուղղությամբ արդեն իսկ փոքր քայլեր են արվում, և Ադրբեջանը նույնպես մասնակցում է այդ գործընթացին։
Leave a Reply