Երևանում կկազմակերպվի հանդիպում քուրդ և թուրք մտավորականներ Մազլում Վեսեքի և Բուրչին Գերչեքի հետ

Առաջիկա չորեքշաբթի օրը՝ մայիսի 20-ին, ժամը 16։30-ին Արևմտահայոց հարցերի ուսումնասիրության կենտրոն գիտահետազոտական հիմնադրամը կազմակերպում է հանդիպում քուրդ և թուրքմտավորականներ Մազլում Վեսեքի և Բուրչին Գերչեքի հետ։

Մազլում Վեսեքը ծնվել է 1984 թ․, Շըրնաք նահանգի Իդիլ գավառում։ Նա համալսարանական տարիներից ի վեր ուսումնասիրություններ է իրականացնում գրականության և կինեմատոգրաֆիայի վերաբերյալ։ Նրա հոդվածները լույս են տեսել տարբեր մշակութային հանդեսներում և պարբերականներում։ Նա նաև մի շարք գրքերի հեղինակ է։

Բուրչին Գերչեքը ծնվել է 1976 թ․, Ստամբուլում։ Մարմարայի համալսարանի Քաղաքագիտության և հանրային կառավարման ֆակուլտետն ավարտելուց հետո մագիստրոսական կրթությունը շարունակել է Ստրասբուրգի Ռոբերտ Շուման համալսարանի Լրագրության ֆակուլտետում։ Հետագայում աշխատել է Ֆրանսիայում լույս տեսնող տարբեր պարբերականներում։ «Նույն ջրից ենք խմել» և «Ստամբուլի փողոցային շները» վավերագրական ֆիլմերի ստեղծման աշխատանքներում համագործակցել է կինոբեմադրիչ Սերժ Ավետիքյանի հետ։

Բուրչին Գերչեքի «Հոսանքին հակառակ․ Հայոց ցեղասպանության ժամանակ հրամաններին ընդդիմացածները, փրկողներն ու դիմադրողները» վերնագրով գիրքը լույս է տեսել Թուրքիայում, 2016 թ․։ Բուրչին Գերչեքը ներկայում աշխատում է «Ֆրանս Պրես» գործակալության՝ Անկարայում գտնվող մասնաճյուղում և միաժամանակ դոկտորական ուսումնասիրություն է իրականացնում ԱՄՆ-ի Կլարկ համալսարանի Հոլոքոստի և ցեղասպանագիտության բաժնում։

Արևմտահայոց հարցերի ուսումնասիրության կենտրոնում մտավորականները կներկայացնեն, թե ինչպես է մի թուրք հեղինակ փորձել յուրացնել արևմտահայ գրող Ատրպետի «Տժվժիկ» ստեղծագործությունը։ Մտավորականների կարծիքով՝ այդ յուրացման փորձը կապված է Օսմանյան կայսրությունում հայերի գոյության հետքերը ջնջելու և Հայոց ցեղասպանության մասին հիշողությունը վերացնելու մտադրության հետ։

Մուտքն ազատ է, հրավիրում ենք բոլոր ցանկացողներին։

Ամսաթիվ՝ մայիսի 20, 2026 թ․

Ժամ՝ 16։30

Հասցե՝ Գյուլբենկյան 38, 5-րդ հարկ

Բանախոսները կխոսեն թուրքերեն, կապահովվի համաժամանակյա թարգմանություն

www.akunq.net