Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն պատմել է «Զանգեզուրի միջանցքի» ուղղությամբ տարվող աշխատանքների ընթացքի մասին։ Ինչպես հայտնում է APA-ն, նախարարը նշել է, որ թուրքական հատվածում արդեն սկսվել է ճանապարհի 224 կիլոմետրանոց հատվածի վերանորոգումը։
«Ադրբեջանական կողմում աշխատանքները մոտենում են ավարտին։ Զանգեզուրի միջանցքի վերաբերյալ պայմանագիրը ստորագրվել է, սակայն շինարարական աշխատանքները դեռ չեն սկսվել։ Կարծում եմ՝ մոտ ժամանակներս դրանք կսկսվեն առանց լուրջ հապաղումների։ Նախիջևանյան կողմում կա 180 կիլոմետր երկարությամբ հատված. դրա մի մասը կվերանորոգվի, մի մասը՝ կկառուցվի նորից։ Մեր կողմում՝ 224 կիլոմետր երկարությամբ հատվածում, շինարարական աշխատանքներն արդեն սկսվել են»,- հայտարարել է նախարարը:
Հիշեցնենք, որ խոսքը տրանսպորտային նախագծի մասին է, որը պետք է Միջին Ասիան և այնուհետև Չինաստանը միացնի Սևծովյան տարածաշրջանին։ Սակայն թուրք նախարարի տերմինաբանությունը բազմաթիվ հարցեր է առաջացնում։ Նախիջևան-Հայաստան-Ադրբեջան հատվածում իրականացվող նախագիծը Բաքվում անվանում են «Զանգեզուրի միջանցք», իսկ Հայաստանում Սյունիքով անցնող հատվածը ստացել է «Թրամփի ուղի՝ հանուն միջազգային խաղաղության և բարգավաճման» (TRIPP) անվանումը։ Հայաստանի իշխանությունները ադրբեջանական «Զանգեզուրի միջանցք» անվանումը փորձում են բացատրել նրանով, որ սահմանակից ադրբեջանական շրջանները «նույնպես Զանգեզուր են»։ Բայց թե ինչպե՞ս է Թուրքիան հավակնում մասնակցություն ունենալ «Զանգեզուրի միջանցքին», կարելի է բացատրել բացառապես տարածքային հավակնություններով։
Leave a Reply