Հայաստանի վարչապետ Նիկոլ Փաշինեան Արցախը եւ արցախահայութեան իրաւունքները զիջելէ ետք, այս անգամ յայտարարեց, որ ընդհանրապէս կը հրաժարի պատմական արդարութեան վերականգնման օրակարգէն:
«Ինչքան գնացինք պատմական արդարութեան յետեւից, այնքան առերեսուելու ենք նորանոր պատմական անարդարութիւնների: Պարտքս եմ համարում սրա մասին տեղեկացնել մեր ժողովրդին», ըսաւ Փաշինեան, որ չմոռցաւ արցախահայերը եւ դատապարտեց անոնց վերադարձի յոյս տուողները։ «Ես ուզում եմ նաեւ կառավարութեան նիստում արձանագրել եւ նոյնիսկ դատապարտել բոլոր այն միտումները, որոնց նպատակը Ղարաբաղից տեղահանուած մեր հայրենակիցներին եւ ընդհանրապէս հայ ժողովրդին պանդուխտի կարգավիճակում պահելն է»: Ըստ անոր՝ խաղաղութեան մասին խօսիլը նաեւ հոգեկան-ընկերային խաղաղութիւն կ՛ենթադրէ, «որովհետեւ խաղաղութիւնը միայն պայմանագիր չէ, խաղաղութիւնն այն է, որ մարդը խաղաղուի: Չկայ աւելի դաժան եւ տառապալի բան, քան սպասումը»:
Աւելի հեռու երթալով՝ Փաշինեան նաեւ քննադատեց ընդհանրապէս հայութեան իրաւունքներու հետապնդումը, մանաւանդ՝ Հայ Դատի ու պահանջատիրութեան պայքարը:
«Մենք, որպէս ժողովուրդ, աւելի քան 100 տարի է այդ սպասումով ենք ապրում: Ուզում եմ ընդգծել, որ սա կայսերական քաղաքականութիւն է, սա հակահայկական, ապահայկական քաղաքականութիւն է, որ մի խաղաղուէք, էսա կը վերադառնաք կամ կը վերադարձնենք, էսա Ցեղասպանութեան միջազգային ճանաչում կը լինի, էսա կը վերադառնաք Վան, Մուշ, Կիլիկիա եւ այդպէս շարունակ: Այս քաղաքականութիւնն ունի երկու նպատակ, առաջինը՝ հայ ժողովրդին պահել պանդուխտի գիտակցութեան մէջ, եւ երկրորդը՝ թոյլ չտալ, որ Հայաստանը որպէս պետութիւն կայանայ: Բաւարար է արդէն մեր ժողովրդին սնենք նոր ցեղասպանութիւնների մասին տուեալներով եւ ընդհանրապէս, այդ ցեղասպանութիւնների մրցավազքը պէտք է դադարեցնել: Ցեղասպանութիւնների մասին խօսոյթով մենք ստանում ենք ցեղասպանութիւնների մասին խօսոյթ, վերադարձի մասին խօսելով մենք ստանում ենք վերադարձի մասին խօսոյթ եւ այդ ամէն ինչը մէկ բանի մասին է՝ Հայաստանի ժողովրդին, ներառեալ Ղարաբաղի ժողովրդին, թոյլ չտալ, որ խաղաղուեն, նրանց պահել պանդուխտի եւ գաղթականի կարգավիճակով, յոյս տալով, թէ էսա միջազգային հանրութիւնը Ցեղասպանութիւնը կը ճանաչի, էսա մի օր Սեւրի պայմանագիրը կ՛աշխատի, էսա մի օր էս կը լինի: Մեր քաղաքանութիւնը եւ ռազմավարութիւնը հետեւեալն է՝ մենք պէտք է խաղաղուենք», ըսաւ Փաշինեան՝ աւելցնելով. «Այդ ի՞նչ երեւոյթ է, որ մարդը ծնուել, մեծացել է Հայաստանում, ապրում է ենթադրենք՝ Քաջարանում, Դիլիջանում կամ որեւէ տեղ: Ինքն այստեղ է ծնուել, մեծացել, իր հայրն այստեղ է ծնուել, մեծացել, բայց ասում ես՝ դու որտեղի՞ց ես, ուզում ես իմանալ՝ որտեղ է ապրում, փողոցը եւ այլն, ասենք՝ մարդը կարող է ասել ես Վանից եմ: Թւում է, թէ այս ինչ հետաքրքիր, հայրենասիրական մօտեցում է, բայց սա լրիւ ուրիշ երեւոյթ է, սա կայսերական հայրենասիրութեան դրսեւորում է: Չեմ վարանի, էլի ուզում եմ ասել, աւելի կոնկրետ (ճիշդ) «ստալինեան հայրենասիրութեան» դրսեւորում է», դիտել տուաւ Փաշինեան:
Արցախի թեման չվրիպեցաւ անոր զրոյցներէն եւ անգամ մը եւս արցախցիները դատապարտեց փախուստ տալու մէջ՝ առասպել նկատելով այն, որ արցախցիները մինչեւ վերջ պայքարած ու դիմացած են: «Իսկ այդ միֆերը՝ Ղարաբաղում ծռուել են մինչեւ վերջ եւ այլն, իմիջիայլոց, կարիք լինի այդ տուեալները կը գաղտնազերծենք: Ես համոզուած եմ այս խմորը շատ ջուր կը տանի, կը սպասենք, որ լաւ տանի, որ Լեռնային Ղարաբաղի բանակցային գործընթացի փաստաթղթերի նման ճիշդ պահին հրապարակեմ, սուտ է, չի եղել նման բան, փախել են, ճողոպրել են: Ես, շատ բան չկարողանալով բացել, ուզում եմ արձանագրել, որ կռուելու եւ այլնի մասին պնդումները մեղմ ասած չեն համապատասխանում իրականութեանը, որովհետեւ մեր հետախուզութեան եւ ոչ միայն հետախուզութեան ունեցած տուեալներով, առկայ զէնք-զինամթերքի առիւծի բաժինը, դա կարող է լինել 80 տոկոս, կարող է լինել 90 տոկոս, մնացել են ձեռք չտուած: Ղարաբաղի իշխանութիւններին ես այն ժամանակ զգուշացրել եմ, ասել եմ՝ եթէ դուրս եկաք, իմացէք՝ այլեւս վերադարձի հնարաւորութիւն չի լինելու», պատմեց Փաշինեան, որ աւելցնելով ըսաւ, որ ինք արցախցիները նկատի չունէր, այլ՝ ընտրանին։ «Ես չեմ ասել եւ չեմ ասում, որ արցախցիները փախել են, ես ասում եմ, որ Ղարաբաղի, այսպէս կոչուած էլիտան (ընտրանին) է փախել, դրանք բոլորովին տարբեր բաներ են: Ես Ղարաբաղի ժողովրդին որեւէ բանում ո՛չ մեղադրել եմ, ո՛չ մեղադրում եմ, ո՛չ էլ կը մեղադրեմ: Ընդհանրապէս, ո՛չ Հայաստանի, ո՛չ Ղարաբաղի ժողովրդին: Ժողովրդին որեւէ բանում մեղադրելն անհեթեթութիւն է, ժողովրդին չի կարելի որեւէ բանում մեղադրել, առաւել եւս Ղարաբաղի ժողովրդին, որոնց մասին ասում եմ, որ պատանդի կարգավիճակում են», պնդեց Փաշինեան, որ օրերէ ի վեր արցախցիները մեղադրելէ չդադրեցաւ:
Ճաշինեան խօսեցաւ նաեւ նոր սահմանադրութեան եւ հանրաքուէին մասին՝ նշելով, որ եթէ նոր Սահմանադրութիւնը հանրաքուէով չընդունուի, այլ հանրաքուէներ պիտի կազմակերպէ: «Նորից կ՛անենք հանրաքուէ, մենք կը գնանք, մեր ժողովրդին կը համոզենք, կը բացատրենք», ըսաւ Փաշինեան:
Leave a Reply