Թուրքական բիզնես – ջեթերի ուշագրավ չվերթերը Երևան. ի՞նչ է հայտնի դրանց մասին

Հայաստանի արտաքին հետախուզության ծառայությունը չի մեկնաբանում, թե ովքեր են եղել ինքնաթիռներում, և թե արդյոք թռիչքները մասնավոր բնույթ են կրել։

ԵՐԵՎԱՆ, 26 մարտի – Sputnik, Դավիթ Գալստյան. Վերջին օրերին Հայաստանի մայրաքաղաք են այցելել թուրքական երկու բիզնես-ջեթեր, որոնց կապում են թուրքական հատուկ ծառայությունների և պետական մարմինների հետ։

Sputnik Արմենիան, մասնավորապես, ուշադրություն է դարձրել այն փաստին, որ մարտի 8-ին թուրքական Sierra Aviation ընկերության Gulfstream G-IV(SP) բիզնես-ջեթը թռիչք է իրականացրել Երևան-Անկարա երթուղով։ Սոցցանցերի օգտատերերը, որոնք զբաղվում են չվերթերին հետևելով և OSINT-ով (հետախուզություն բաց աղբյուրների հիման վրա), այս ինքնաթիռը կապում են Թուրքիայի հատուկ ծառայությունների հետ։

Gulfstream G-IV(SP) բիզնես-ջեթը թռիչք է իրականացրել Երևան-Անկարա երթուղով

© Photo

Թռիչքների աշխարհագրությունը նույնպես վկայում է այն մասին, որ ինքնաթիռը հազիվ թե օգտագործված լինի սովորական կոմերցիոն նպատակներով։ Մասնավորապես, օդանավը պարբերաբար թռչում է Մերձավոր Արևելքի (Օման, ԱՄԷ, Սաուդյան Արաբիա) և Աֆրիկայի (Լիբիա, Եգիպտոս, Սուդան) երկրներ։

Ավելին, այն մի անգամ օգտագործվել է Ալբանիայի վարչապետ Էդի Ռամայի թռիչքի համար։

Հաշվի առնելով թռիչքների հետաքրքիր պատմությունը՝ մենք ԱԳՆ-ից հետաքրքրվեցինք՝ արդյոք թուրքական որևէ պատվիրակություն այցելել է Երևան։ Մեզ հայտնեցին, որ արտաքին քաղաքական գերատեսչության մասով հյուրեր չեն եղել։

Sputnik Արմենիան հարցում է ուղարկել նաև ՀՀ արտաքին հետախուզության ծառայությանը՝ հետաքրքրվելով. 1) Արդյոք դա եղել է Թուրքիայի ներկայացուցիչների այց հետախուզական գծով, 2) եթե ոչ, ապա արդյոք թռիչքը մասնավոր բնույթ է կրել։

ՀՀ ԱՀԾ-ից մեր հարցերին հստակ չեն պատասխանել, փոխարենը մանրամասն անդրադարձել են իրենց գործունեության առանձնահատկություններին։

Մասնավորապես նշել են, որ «ծառայության առջև դրված խնդիրներով և գործունեության առանձնահատկություններով պայմանավորված՝ ծառայությունն իր գործունեությունն իրականացնելիս առաջնորդվում է օրենսդրի կողմից սահմանված գաղտնիության սկզբունքի խստագույն պահպանմամբ և օբյեկտիվորեն որդեգրել է ծառայության գործունեության մասին հանրային քննարկման հնարավորինս ցածր մակարդակ ապահովելու քաղաքականություն»:

Նման մոտեցումը, ինչպես նշել են հատուկ ծառայությունում, կոչված է ապահովելու ոչ միայն ԱՀԾ-ի բնականոն աշխատանքը արտաքին հետախուզական գործունեության իրականացման շրջանակներում, այլ նաև` թույլատրելիության սահմաններից դուրս տեղեկատվության հանրայնացման արդյունքում թույլ չտալու պետության և հասարակության համար անվտանգային հնարավոր ռիսկերի առաջացումը:

«Հաշվի առնելով վերոգրյալը՝ տեղեկացնում ենք, որ և՛ 1-ին, և՛ 2-րդ հարցադրումներին ծառայության կողմից դրական կամ բացասական պատասխան ենթադրող տեղեկատվության տրամադրումը նպատակահարմար չի համարվում»,-ասված է պատասխանի մեջ։

Նշենք, որ ԱՀԾ-ին արդեն ուղարկել էինք հարցումը, երբ Երևանի երկնքում նկատվեց երկրորդ նմանատիպ չվերթը։

Այս անգամ Dassault Falcon 7X ինքնաթիռը Երևանից մեկնել է Ստամբուլ։

Ինքնաթիռը Երևանից մեկնել է Ստամբուլ

© Photo : flight radar 24

Այս օդանավը պատկանում է Zafer Air ընկերությանը, որը նույնպես կապվում է Մերձավոր Արևելքում և Աֆրիկայում իրականացվող «զգայուն» չվերթերի հետ։

Հատկանշական է, որ առաջին ինքնաթիռը՝ Gulfstream G-IV(SP)-ը, նախկինում նույնպես եղել է Zafer Air-ի պարկում։

Այսպիսով, եթե ենթադրենք, որ Հայաստան է ժամանել թուրքական պատվիրակություն, ապա տվյալները համադրելով` կարելի է ենթադրել, որ առաջին չվերթով ժամանել է տեխնիկական խումբը, իսկ երկրորդով՝ անմիջական բանակցողների պատվիրակությունը։

Այդուհանդերձ, պաշտոնական տեղեկատվության բացակայության պայմաններում չվերթի նպատակների և ուղևորների մասին միանշանակ պնդումներ անել հնարավոր չէ։

Հիշեցնենք, որ մարտի 11-ից Turkish Airlines ավիաընկերությունը սկսել է չվերթեր իրականացնել Ստամբուլ-Երևան-Ստամբուլ երթուղով։

https://arm.sputniknews.ru/20260326/turqakan-biznes–jeteri-ushagrav-chvertery-erevan-inch-e-hajtni-dranc-masin-100165353.html