Հայաստանի հետ սահմանի թրքական «Ալիջան» անցակէտին վրայ սկսած են բացման նախապատրաստական աշխատանքները

Թրքական մամուլը կը հաղորդէ, որ Թուրքիոյ եւ Հայաստանի միջեւ ընթացող կարգաւորման հոլովոյթի ծիրին մէջ արագացած են սահմանային անցակէտերու բացման ուղղութեամբ աշխատանքները: Այդ ծիրին մէջ երկու երկիրներուն միջեւ կարեւոր անցումային կէտերէն մէկուն մէջ` Ալիջանի սահմանային անցակէտին մէջ, սկսած են թեքնիք ուսումնասիրութիւններ եւ նախապատրաստական քայլեր: Այս մասին կը գրէ «էրմենիհապեր»-ը:

Հրապարակման համաձայն, Ազրպէյճանի եւ Հայաստանի միջեւ 44-օրեայ պատերազմէն ետք խաղաղութեան համաձայնագիրի ստորագրութիւնը նպաստած է շրջանային կարգաւորման հոլովոյթին, որուն գործնական քայլերէն մէկը դարձած է անցեալ շաբաթ Ազրպէյճանի կողմէ Հայաստան վառելանիւթի մատակարարումը` իբրեւ առաջին առեւտրական նախաձեռնութիւն:

Թուրքիոյ եւ Հայաստանի միջեւ դիւանագիտական հաղորդակցութիւններու յառաջընթացի պայմաններուն մէջ Ալիջանի անցակէտին մէջ կատարուող աշխատանքներուն նպատակներն են անցակէտը սկզբնական փուլին բանալ բեռնափոխադրումներու համար` Մարգարայի կամուրջին ճամբով, իսկ հետագային` նաեւ ճաբորդներու փոխադրումներու համար:

Կը նշուի, որ ծրագիրի ծիրին մէջ կը նախատեսուի Ալիջանի ճամբով լրացուցիչ շինարարութիւն` զայն միացնելով Քարաքոյունլու շրջանի խաչմերուկին եւ «Զանգեզուրի ճամբուն», ինչ որ կարելիութիւն պիտի տայ բարելաւել Իգդիրի ուղղութեամբ կապը եւ բարձրացնել շրջանային առեւտուրի եւ գումակային կարելիութիւնները:

Այդ նպատակով Ալիջանի անցակէտին մէջ ուսումնասիրութիւններ կատարած են Իգդիրի նահանգապետ Էրճան Քէօքրը, Թուրքիոյ պաշտպանութեան նախարարութեան գումակային աշխատանքներու ընդհանուր տնօրէնի ժամանակաւոր պաշտօնակատար գնդապետ-զօրավար Ահմեթ Համտի Աթաչը եւ շարք մը պետական կառոյցներու ներկայացուցիչներ: Սահմանային գօտիին մէջ քննարկուած են թեքնիք ենթակառոյցներու բարելաւման, գործող չափորոշիչներու բարձրացման եւ գումակային կարողութիւններու ամրապնդման հարցերը:

www.aztagdaily.com