Հայկական ծագմամբ երգիչ և երաժիշտ Արամ Տիգրանը, որը երգում է քրդերեն, հայերեն, արաբերեն և թուրքերեն, հարցազրույցի ժամանակ պատմել է, թե ինչպես է իր հայրը փրկվել Հայոց ցեղասպանության ժամանակ, գրում է «Քրդստանի ձայն» թելեգրամյան ալիքը:
«Ես քեզ մի պատմություն կպատմեմ։ Մի անգամ հայրս և ես միասին նստած էինք՝ դա Ղամիշլոյում էր, և հայրս ինձ ասաց. «Որդի՛ս, նայիր, դու այս աշխարհում ողջ ես միայն քրդերի շնորհիվ»»,- երգչի խոսքերն է մեջբերում ալիքը։
«Ես չհասկացա… և հարցրի. «Ոնց թե, հայրի՛կ, ախր դա քո շնորհիվ է եղել, չէ՞»։ Նա պատասխանեց. «Գուցե այդպես է, բայց եթե ես սպանվեի, դուք որտեղի՞ց կլինեիք։ Իսկ ինձ չսպանեցին»։
«Ես հարցրի՝ «ինչպե՞ս փրկվեցիր»։ Նա ասաց. «Մի քուրդ աղայի շնորհիվ։ Հենց նա ինձ փրկեց ու մեծացրեց։ Այդ տարիներին երբ թշնամու զորքերը մոտենում էին, նրանք մոտենում էին իմ փրկչին և ասում. «Մենք գիտենք, որ դու փրկել ես մի հայի, և նա քո տանն է, բեր այստեղ նրան»։
Ամեն անգամ նա ինձ թաքցնում էր, որպեսզի ինձ չսպանեն, անընդհատ փող էր տալիս այդ դահիճներին, որ նրանք հեռանան և ինձ ձեռք չտան։ Այդպես էլ ես մեծացա նրա խնամքի տակ, մինչև որ ոտքի կանգնեցի, և ինձ արդեն ոչինչ չէր սպառնում»։
Իսկ հետո նա ավելացրեց. «Քանի դեռ ապրում եք այս աշխարհում, հիշեք. դա միայն քրդերի շնորհիվ է։ Եվ դրա համար երբեք մի մոռացեք քրդերին, միշտ ցույց տվեք նրանց ձեր բարեկամությունը, մտերիմ եղեք նրանց հետ, երգիր նրանց երգերը և, իհարկե, երգիր նաև հայկական երգեր, մի մոռացիր։ Բայց միշտ ավելի շատ ձգտեք նրանց»։
Ահա թե ինչպես հայրս իմ մեջ քրդերի նկատմամբ ամենաջերմ զգացմունքները սերմանեց։ Այսպես ես սկսեցի հորս հետ քրդական երգեր երգել, իսկ հետո՝ ավելի ու ավելի շատ»,- հայ երգչի հետ հարցազրույցից մի հատված է մեջբերել ալիքը։
Leave a Reply